Ba nhôn năm lăng dơ̆ng dôm hơnih tơblăh 50 sơnăm sơ̆, lĭnh so Đinh Nhiêu oei tơ̆ xăh Ia Yeng, apŭng Phú Thiện, oei ƀlŏk hơnơ̆ng ‘măng tơblăh găn tơ̆ trong 7. Ƀơ̆t doh sơ̆, ƀok ‘noh Kơdră Trung đội 2, C1, H11 găh Tĭnh đô̆i Gia Lai - Kon Tum. Ƀok Đinh Nhiêu tơroi: đơ̆ng rŏng khŭl lĭnh bơ̆n rơngei Buôn Ma Thuột, hloh 15 rơbâu lĭnh ayăt hli tăr văr kơdŭn lĕch đơ̆ng Kon Tum păng Pleiku jur tơ̆ tơmăn kiơ̆ trong 7. Khŭl lĭnh ‘noh huŏng lơ̆m tơdrong tơsŭl tơsăl ƀơ̆t đei bơ̆n tơblăh tơdrŭt:

“Khei ‘năr doh sơ̆ lĭnh ayăt ‘noh pơđĭ 1 khŭl mă lei ưh kơ đei 1 ƀôt, ƀơ̆t doh gre nar, kơnong kơdâu kư̆ kă, ưh kơ đei bơngai pơgơ̆r, kơplăh ‘noh ƀôm ƀrơ̆m, phao kơtoang hŭt ƀĕnh tơ̆ trong. Kơplăh doh ƀô̆ đô̆i tơm, ƀô̆ đô̆i tơring ‘noh tă kơ chô̆ che kok tơ̆ ti păih ‘ngieo, tơdăh ưh kơ che kok ‘noh ưh kơ sĭ lĭnh bơ̆n”.

Tơter rok trong 7, dôm hơnih nhen gơng Đak krong Pa, gơng ‘Long Hơra, kông krang Tô Na… hlôi jing tơdrong hli tôch kơ dêh kơ khŭl lĭnh ayăt. Lĭnh so Ksor Chư, kơplăh doh găh Trung đoàn 48, Sư đoàn 320, Quân đoàn 3, ƀrơ̆k kơ jơhngơ̆m ƀlŏk dơ̆ng tơdrong tơblăh jơnei sơ̆:

“Ƀơ̆t kơ tơ̆ng tơroi kăl ‘noh Quân đoàn 2 ayăt kơdâu lĕch tơ̆ trong 7, thoi noh anih jang pơvang găn, kơnong đôh dĭng dăng. Ƀơ̆t kơplăh doh anih jang ‘nhŏng Tạ Tấn, Chính ủy athei Chư iŏk gre năm dŏng kon pơlei, ĭnh pơm kiơ̆ nơ̆r athei. Jơhngơ̆m tơblăh năr doh sơ̆ ưh kơ băt tơroi liơ, ĭnh tôch kơ chhôk ‘nă yua kơ ĭnh hlôi jang đei 1 tơdrong ‘lơ̆ng hơiă đơ̆ng tơdrong hơrih ĭnh.”

Ƀơ̆t lĭnh bơ̆n tơblăh găn tôch kơ tang, lĭnh ayăt tơklăh lĕch jơ̆p bri kông. Lơ hơnih, lĭnh ayăt chă chô̆ ti kơdih, dui băl lĕch tơ̆ trong 7 yơ̆r hla kơ kok jei kơbơ̆n. Lơ̆m đon ƀlŏk đơ̆ng Đại tá Nguyễn Vi Hợi, Lĭnh kon pơlei nuih mơng, sơ̆ lĭnh Trung đoàn 64, Sư đoàn 320, Quân đoàn 3, dôm năr khei 3 sơnăm 1975 hăm dôm ‘măng tơblăh krưp krĕnh mă lei ƀĕnh jơhngơ̆m ‘nă hal:

“‘Măng tơblăh krưp krĕnh hloh mă ĭnh vang iung tơblăh ‘noh jĭ ‘năr 17 păng 18/3, 2 năr ‘noh jĭ găn khŭl Quân đoàn 2 kơ Việt Nam Cộng hòa tơ̆ trong kơsô̆ 7. Doh sơ̆ ling lang băt hơdăh đon tơchĕng ‘noh rơngei tơring Pơbăh rơngei teh đak. Kơplăh doh, ƀơ̆t tơblăh nhôn ưh kơ tơchĕng kiơ truh tơdrong lôch hơchăng, ƀơ̆t yơ lôch ‘noh lôch, ƀơ̆t yơ đei rơka ‘noh rơka, jĭ ling lang 1 jơhngơ̆m đon vă vang iung tơblăh.”

Tơblăh jơnei Trong 7 hlôi tơgop gĭt kăl lơ̆m tơblăh jơnei Tây Nguyên, pơih ăn tơdrong hiôk vă lĭnh păng kon pơlei bơ̆n tŭn hrĕnh tơdrong iung tơblăh pơyan Puih mak 1975, rơngei tơring pơbăh, rơngei teh đak. Đĭ 50 sơnăm hloh bơih, trong 7 – jăl trong hlôi lăng ƀôh dôm tơdrong tơblăh jơnei nuih mơng, dang ei hlôi jing Trong gre kơsô̆ 25, mĭnh trong tơm tơƀưh Gia Lai hăm dôm dêh char tơter đak dơsĭ tơring Tŏk bŏk.

Ƀok Rah Lan Chung, Kơdră Anih vei lăng kon pơlei dêh char Gia Lai, tơroi găh tơdrong hơtŏk tơiung kơ tơring tơ̆ jăl trong ‘nâu: “Trong gre kơsô̆ 25 - trong 7 âu ki hlôi đei pơm hơmet ming, hrei ‘nâu trong âu tơƀưh jur tơ̆ dêh char Phú Yên tôch kơ hiôk. Hrei ‘nâu lơ̆m proh hơmet păng trong vă jang hơtŏk tơiung kơ dôm apŭng lơ̆m dêh char năm klĕch trong âu ‘noh đei: Phú Thiện, Ayun Pa, Krông Pa, ‘noh trong hơtŏk tơiung kơ dôm tơring ‘nâu tă ‘moi kiơ̆ lơ̆m trong tơm ‘nâu ngăl. Tơring ‘nâu dang ei hlôi pơjing dôm anih kơdrơ̆m. Tơdrong hơrih sa đei ƀôh păng đei tơdrong hơtŏk tơiung pơting hăm dôm sơnăm hơdrol âu tôch kơ lơ, kon pơlei tôch kơ chơt hơiă, vang yak hơdai hăm Đảng, Teh đak vă bơ̆jang kiơ̆ dôm trong jang găh hơtŏk tơiung mŭk drăm, hơtŏk ‘lơ̆ng tơdrong hơrih sa”.

Tơring thŭng thong Cheo Reo dang ei hlôi tơƀăk ăn kơdih um ai ‘nao. Kơmâu jơk glơch glach đơ̆ng plei ‘long hăm dôm hnam man kơjăp ‘lơ̆ng hlôi sŭt lê̆ tơdrong đei ƀôh đơ̆ng 1 chăl tơblăh vang, tŏk bŏk ƀrư̆ ƀrư̆ tơplih jing tơring tơm mŭk drăm păih Hơlĕch Pơbăh dêh char Gia Lai.