Kiơ̆ trong jang ‘nâu, 7 anih vei lăng ‘nao gô đei pơjing kiơ̆ đơ̆ng tơmât hơdai dôm xăh, phường hrei ‘nâu, pơm lăp hăm tơdrong hơgăt găh teh păng kơsô̆ kon pơlei. 7 anih vei lăng ‘nao đei Phường Thống Nhất, Phường Pleiku, Phường Diên Hồng, Phường Hội Phú, Phường An Phú, Xăh Biển Hồ păng Xăh Gào.

Tơdrong hơmet ming đei bơ̆ jang kiơ̆ đơ̆ng hơlen năng rim tơdrong ƀơm truh chăl arih so, jŏh ayŏ kơ dŏ xoang, groi teh păng tơdrong jang mŭk drăm, tơpôl. Dôm Anih vei lăng ‘nao lăp hăm tơdrong hơgăt đơ̆ng Trung ương găh teh păng kơsô̆ măt bơngai. Atŭm hăm ‘nŏh oei vă tưk tơiung dôm tơdrong pran ‘lơ̆ng đơ̆ng rim tơring, pơjing tơdrong hiôk hian ăn tơdỏng jang tŏk mŭk drăm, tơpôl, vei kơjăp tơdrong sơđơ̆ng teh đak, sơđơ̆ng lơ̆m chăl ‘nao.