"Pran kơtang jĭ chĭng chêng, gơ̆h hơgei jĭ nơ̆r pơma xa. Chĭng tih ‘mơ̆i mă nơ̆r gơ̆h re ang". ‘Nâu jĭ nơ̆r pơma đơ̆ng Ƀok Hô lơ̆m sơnăm 1945 găh anih dơ̆ng păng tơdrong jang tơbôl. Tơblăh jơnei Điện Biên Phủ 1954 jĭ jơva ƀơ̆r chĭng re jơ̆p lơ̆l plei teh, re mât lơ̆m Hop akŏm Geneve, phă pơđĭ jơhngâm đon tơblăh đơ̆ng hơyăt Phalăng, athei đe sư truh pơma đam hăm Khul kơdră teh đak Việt Nam Dân chủ cộng hòa.

Phó Thủ tướng Bùi Thanh Sơn pơma hơdăh, Tơdrong tơchơ̆t Geneva 1954 jĭ 1 khei ‘năr tôch gĭt kăl lơ̆m chăl bơ̆ jang tơbôl đơ̆ng kăch mang Việt Nam, đei ƀĕnh jơhngâm đon ‘lơ̆ng păng gơ̆h hơgei đơ̆ng Ƀok Hô:

“Jơnăr pơma đam, kĭ pơkăp păng pơm kiơ̆ Tơdrong tơchơ̆t Geneva jĭ kơsơ̆p hla ar chih ƀĕnh ƀai hŏk kăp gĭt tơƀôh hơdăh tơdrong rơgei đơ̆ng khul chă pơma nuh păng anih jang tơbôl Việt Nam, ‘moi kiơ̆, iŏk yoa rơgei păng pơm hơtŏk tơdrong ‘lơ̆ng mưh pơma đam, kĭ pơkăp păng pơm kiơ̆ Tơdrong tơchơ̆t Paris 1973 đơ̆ng rŏng âu kŭm nhen lơ̆m tơdrong pơjing, atŏk tơiung păng vei lăng teh đak hrei ‘nâu.”

Rim jơhnơr đơ̆ng rŏng ling lang hưch hanh hăm tơdrong tơblăh jơnei Điện Biên Phủ pơma hơdrô̆ păng dôm tơdrong tơblăh hŭt hơyăt nai pơma atŭm vang đĭ đăng vang adrin, khŏm bơ̆ jang tơiung pơjing teh đak rơngei, pran kơtang, hơnŭk hơnoa.

PGS.TS Nguyễn Đức Hòa, tơ̆ Hnam trưng Đại học Sài Gòn, pơma: “Kiơ̆ kơ inh, tơdrong gĭt kăl đei ƀơm truh đơ̆ng tơdrong ‘nâu oei tôch tih păng bơ̆n athei tưk tơiung, iŏk yoa sư mă ‘lơ̆ng. Apŭng plenh teh băt truh um rup kơtang nuih mơng đơ̆ng 1 hơdrĕch hơdrung tơ̆ Điện Biên Phủ, ‘nŏh apŭng plenh teh kŭm lăng ƀôh 1 teh đak Việt Nam kơtang nuih mơng, hơnŭk hơnoa ‘năi. Thoi noh chăl so kơtang nuih mơng đơ̆ng Điện Biên Phủ oei hơnơ̆ng đei kơjăp lơ̆m kon pơlei Việt Nam păng kon pơlei apŭng plenh teh.”

Tơ̆ hơnăp dôm tơdrong krê hơmơt, pơmat tat lơ̆m apŭng plenh teh hrei ‘nâu, tơmât yoa rơgei dôm ƀai hŏk kăp gĭt lơ̆m tơdrong tơblăh, Việt Nam hlôi sek tơlang tôch trŏ dôm tơdrong pơvei jang tơbôl kiơ̆ đơ̆ng ‘moi kiơ̆ trong jang kơjăp ‘lơ̆ng, gơ̆h hơgei mưh pơma xa, hơtŏk jơhngâm đon ‘lơ̆ng, hơnơ̆ng druh kiơ̆ trong pơma nuh păng jang hơdoi. Gơnơm thoi noh, vei kơjăp tơdrong rơngei, sơđơ̆ng ‘lơ̆ng hai, vei kơjăp ‘lơ̆ng tơdrong pơm tơm kơ 1 teh đak păng atŏk tơiung tơdrong jang hơdoi pơyoa ăn tơdrong jang tŏk mŭk drăm, tơpôl hai./.