Kơmăng 9/7, tơ̆ Hnam Hơri plt Hồ Chí Minh pơgơ̆r tơdrong Hơri hơxoang gĭt kăl ƀlŏk hơdơ̆r kơ Tổng Bí thư Lê Duẩn yoa Khul hơri hơxoang Quân khu 7 jang hơdoi hăm Hnam Jŏh hơri Hơdrĕch hơdrung Bông sen pơgơ̆r ƀlep ƀât tơbăt 37 sơnăm Năr nhap ƀok Tổng Bí thư Lê Duẩn lôch hơchăng (10/7/1986-10/7/2023). Kơdră tĕh đak Võ Văn Thưởng vang truh akŏm.

Tơdrong hơri hơxoang jĭ jơnăr vă rim jơhnơr hrei ‘nâu ƀlŏk hơdơ̆r păng băt bơnê kơ 1 ‘nu Kơdră chĕp kơ̆l Ðảng tôch hơgei, tơgŭm ăn bơ̆n băt hơdăh ƀiơ̆ tơdrong arih, jang kăch mang đơ̆ng Tổng Bí thư Lê Duẩn, mă loi jĭ jơhngâm đon ‘mêm băt đơ̆ng kon pơlei Tơring Pơbăh, đơ̆ng pơlei pơla Quảng Trị hăm Tổng Bí thư Lê Duẩn.

Lơ̆m tơdrong hơri hơxoang, kiơ̆ đơ̆ng ƀai hơri hơxoang, tơdrong jang kăch mang đơ̆ng Tổng Bí thư Lê Duẩn đei tơƀôh tôch kơtang nuih mơng, ‘lơ̆ng rŏ. Đơ̆ng dôm sơnăm ƀok oei tơ̆ pơlei truh khei ‘năr bơ̆ jang tơ̆ tơring Pơbăh, mưh ƀok đei pôk pơm Bí thư Đảng Tơring, đang kơ ‘nŏh truh tơdrong tơblăh Hồ Chí Minh tôch gĭt kăl... đei tơƀôh hơdăh tôch hơiă.