Đunh kơ au vă jê̆ pơđăm jĭt sơnăm sơ̆, rơbau ‘nu hơdruh tơdăm hlôi tơhlăh ti hăm Hơnih tơm Hà Nội vă mơ̆t tơ̆ tơring Pơbăh Tây Nguyên muih roh choh jang sa kiơ̆ nơ̆r krao hơvơn tơ iung pơjing tơring choh jang sa ‘nao. Tơmam drăm mă đe sư hơnhăk ba ưh khan lăp jơhngơ̆m pran kơ khul mơlôh mă lei oei hơnhăk ba hloi jơhngơ̆m đon oei sa joăt joe đơ̆ng pơlei pơla kơdih vă tơ iung pơjing mĭnh apŭng atŏk tơ iung. Đe sư hơnhăk ba hloi hơnăn tơring joăt joe nhen Mê Linh, Gia Lâm, Từ Liêm, Đông Anh ... Vă krao hơnăn ăn dôm pơlei, tơring lơ̆m tơring tơrang ‘nao.

Tơring Liên Hà, apŭng Lâm Hà hrei au ‘nŏh hơnăn kơ mĭnh tơring tơ̆ apŭng Đan Phượng, pơlei tơm Hà Nội. Yă Nguyễn Thị Bích Hạnh kiơ̆ ŭnh hnam mơ̆t oei tơ̆ Lâm Đồng đơ̆ng ‘lơ̆p, dang ei ‘nŏh Kơdră chĕp pơgơ̆r Khul drŏ kăn tơring Liên Hà tơbăt, lơ̆m tơring đei hloh 2.000 ŭnh hnam hăm dang 9.000 ‘nu măt bơngai. Kon pơlei tơ̆ au ling lang tơbăt hơdăh jơhngơ̆m đon tơgoăt tơgoăl lơ̆m choh jang sa.“Hăm Liên Hà ‘noh jơhngơ̆m đon tơgoăt tơgoăl kơ pơmai oh drŏ kăn lơ̆m jang kiơ̆ tơ iung pơjing tơring tơrang ‘nao hlôi atŏk kơtang. Pơmai oh hlôi pơjing rim khul jang hơdoi pơtăm pơmur rong sơdrông pơm brai tơ̆ tơring kon kông. Pơmai oh bơngai Cil, K’Ho hlôi hơdrin pơtăm ‘long pơmur, đei tơgŭm ăn kon jên đơ̆ng Hơnih jang vei lăng Choh jang sa vă răt hơnar hơdrông, răt grang, vei lăng năng tông ‘long pơmur păng răt dơđăh pơmur hle. Đơ̆ng noh, tơdrong hơrih sa kơ pơmai oh đei tơplih hơdăh, kơ yuơ jang sa iŏk đei kiơ̆ kơ ‘năr vă chă răt sa lơ̆m ŭnh hnam”.

Truh dang ei, jang saiŏk đei jô̆ hơtŏ măt bơngai tơ̆ apŭng Lâm Hà, dêh char Lâm Đồng iŏk đei hloh 52 triu hlak jên, tŏk hloh 2 ‘măng 1 poăt pơtêng hăm sơnăm hơdrol; ŭnh hnam dơnuh jei tơjur kơtang dang ei lăp pă 1,68%; 100% tơring đei drơ̆ng nơ̆r iŏk đei jing tơring tơrang ‘nao; jĭ apŭng dơ̆ng mă 5 kơ dêh char Lâm Đồng đei Thủ tướng Teh đak drơ̆ng nơ̆r jing apŭng iŏk đei jing tơring tơrang ‘nao jăl jang 2016 – 2020; păng đei Kơdră chĕp pơgơ̆r Teh đak pôk ăn Mê đai jang pran kơtang dơ̆ng mă 3.   

Mŭk drăm-Tơpôl atŏk tơ iung, tơdrong hơrih sa joh ayŏ jơhngơ̆m đon kơ kon pơlei rim hơdrung oei lơ̆m apŭng Lâm Hà – tơring choh jang sa ‘nao kơ bơngai Hà Nội oei tơ̆ Lâm Đồng jei đei atŏk kơtang. Ƀok K’Thế - Kơ iĕng kơdră chĕp pơgơ̆r Hơnih tơm Joh ayŏ kơtơ̆ng ang păng đă ƀŏng lŏng tơplŏng kơdau apŭng Lâm Hà tơbăt, lơ̆m rim tơdrong pơgơ̆r joh ayŏ, mă kăl ‘nŏh rim tơdrong pơgơ̆r tih tơ̆ tơring, ling lang tơƀôh hơdăh tơdrong oei sa joăt joe kơ bơngai Hà Nội păng bơngai kon kông kơtă.“Hơnăn “Lâm - Hà” ‘nŏh hơgrop hơnăn kơ Lâm Đồng păng Hà Nội, kơna tơdrong tơgoăt tơgoăl kơ rim hơdrĕch hơdrung lơ̆m apŭng tôch kơ ‘lơ̆ng, adoi gơnơm đơ̆ng trong bơ̆ jang đơ̆ng Đảng, Teh đak mă đei. Ưh khan lăp hơdrô̆ kon pơlei kon kông mă lei Đảng teh đak tôch kơ ‘meh vă vei răk tơƀăk mong rim tơdrong oei sa joăt joe sơ̆ ko nhen chĭng chêng, tơdrong hơri au to. Hơpơi kơ Đảng, Teh đak lăng ba, tơgum djru vei răk tơƀăk mong tơdrong oei sa joăt joe hơdrech hơdrung. Vă đơ̆ng rŏng au kơnh mŭk drăm gô atŏk tơ iung hloh, gô jang kiơ̆ lơ tơdrong gơ̆h hơgei kih thuơ̆t lơ̆m choh jang sa. Lơ̆m tơdrong vei răk tơƀăk mong tơdrong oei sa joăt joe sơ̆ ki ‘noh nhôn hơmŏ gô tơmơ̆t lơ̆m pơtho pơhrăm tơ̆ rim lăm hŏk găh tôn chĭng chêng, hơri sơ̆ ki. Mĭnh păh tơgop tơgŭm ăn rim đe oh hlôh vao găh tơdrong oei sa joăt joe sơ̆ ki kơ hơdrĕch hơdrung mĭnh păh tơgŭm ăn vei răk tơƀăk mong tơdrong oei sa joăt joe sơ̆ ki kơ hơdrĕch hơdrung bơ̆n ăn jơhnơr mơlôh đơ̆ng rŏng”.

Ƀok Trần Văn Hiệp, Kơdră chĕp pơgơ̆r Hơnih vei lăng kon pơlei dêh char Lâm Đồng hôn bơnê kơtang tơdrong mă apŭng Lâm Hà hlôi hơdrin iŏk đei lơ̆m khei năr au ki, adoi sơkơ̆t hơdăh trong jang tơ iung pơjing tơring tơrang ‘nao hlôi tơpă jing tơdrong jang atŏk tơ iung kơtang hloh, jơ̆p jang hloh lơ̆m dêh char, đei pơđĭ khul chinh trĭ păng kon pơlei vang iung jang kiơ̆ tơnăp. Lơ̆m dêh char hlôi đei 107 lơ̆m 111 tơring iŏk đei jing tơring tơrang ‘nao, 2 pơlei tơm hlôi jang keh đang tơdrong jang tơring tơrang ‘nao păng 5 apŭng đei drơ̆ng nơ̆r jing tơring tơrang ‘nao. Ƀok Trần Văn Hiệp, pơma:“Vă hơnơ̆ng atŏk kơtang iŏk đei jơnei, nhôn athei lơ̆m khei năr kơnh, apŭng Lâm Hà atŏk kơtang hơmet ming choh jang sa, tơplih ‘nao trong jang sa, tơ iung pơjing rim tơring pơtăm ‘long pơtăm akŏm mĭnh ƀôt să trŏ lăp ăn pơkăp ‘lơ̆ng păng băt hơdăh tơm a la chă. Kiơ̆ yok dôm tơdrong đei, tơdrong jang pran kơtang kơ tơring, chă hơvơn rim khul ăn tơmơ̆t jên jang atŏk tơ iung Muk drăm-Tơpôl. Sơđơ̆ng ăn bơ̆ jang tơjur dơnuh kơjăp ‘lơ̆ng, sơđơ̆ng dơ̆ng kơjăp tơpôl. Hơnơ̆ng kiơ̆ yok rok jơ̆ng tơdrong joăt joe tơgoăt tơgoăl pôm nơ̆r ƀơ̆r đon, tơgop lơ hloh dơ̆ng, tơpă hloh dơ̆ng lơ̆m tơdrong atŏk tơ iung atŭm kơ dêh char Lâm Đồng”.