Apŭng Ia Pa, dêh char Gia Lai đei pơjing lơ̆m sơnăm 2002, hăm 9 tơring. Lơ̆m au đei 7 tơring tơnap tap hloh. Mă lei, hăm jơhngơ̆m đon tơgoăt tơgoăl kơjăp, lăp mĭnh ƀơ̆r đon pơđĭ khul jang chinh trĭ, jơhngơ̆m đon kơrŭn đĭ ai đơ̆ng rim răih kon pơlei, truh dang ei, apŭng Ia Pa hlôi tơplih ‘nao ‘lơ̆ng hơ iă, hlôi đei 2 tơring Ia Ma Rơn hăm Ia Tul iŏk đei jing tơring tơrang ‘nao. Jang sa iŏk đei kơ kon pơlei jô̆ hơtŏ măt bơngai rim sơnăm hloh 40 triu hlak jên. ‘Nhŏng R’Ô Hôk- oei tơ̆ Pơlei Marin 3, tơring Ia Mrơn, apŭng Ia Pa tơbăt: “Pơlei Marin 3, tơring Ia Mrơn, apŭng Ia Pa găh lơ bơngai Jrai. Sơ̆ tơdrong hơrih sa kơ kon pơlei tôch mơmat tat kơ yiơ choh jang sa kiơ̆ sơ̆ ki, trong nơnăm tơnap tap dơ̆ng. Atŭm hăm tơdrong chă hơdrin jang sa păng tơdrong lăng ba kơjăp đơ̆ng Đảng, Teh đak tơmơ̆t jên jang, tơgŭm djru, pơlei Plei Marin 3 hlôi tơplih lơ, trong nơnăm ‘lơ̆ng liĕm chă yak hiôk hian, hnam hop akoưm pơlei, cham đă ƀŏng lŏng tơplŏng kơdau, hnam trương hŏk đei tơ iung pơjing ming man ‘lơ̆ng liĕm. Kon pơlei bơ̆n tơ̆ au hlôi băt iŏk yua kih thuơ̆t lơ̆m choh jang sa vă vei lăng năng tông ‘long pơtăm, kon tơring ‘lơ̆ng hơ iă, băt jang chŭn na ƀa đak. Gơnơm đơ̆ng noh, truh dang ei, Plei Marin 3  hlôi đei lơ ŭnh hnam yak hloh dơnuh hin, tơdrong hơrih sa kơ kon pơlei roi năr roi sơđơ̆ng tơplih ‘nao pơtêng hăm sơ̆ tôch kơ dêh, dôm pơbŭng hnam ‘nao ming man roi lơ tơƀôh hơdăh ăn tơdrong tơplih roi năr roi kơtang kơ pơlei pơla”.

Lơ̆m dôm sơnăm kơ âu, tơ̆ dôm apŭng: Tu Mơ Rông, Đăk Tô, Đăk Hà, Kon Plông, Kon Rẫy kơ dêh char Kon Tum đei lơ đoan viên, hơdruh tơdăm bơngai Xơ Đăng pơm jang mŭk drăm hơgei păng pơjing tơdrong hơrih unh hnam phĭ tơtŏ, dơnŏ ‘lơ̆ng. Hơdah noh dôm Khul jang hadoi, Hơp tak xah pơtăm ‘lơ̆ng pơm pơgang; Khul pơgleh chĭng chêng – suang kơ đe đoan viên, hơdruh tơdăm tơ̆ dôm apŭng Tu Mơ Rông păng Kon Plông. Atŭm hăm tơdrong choh jang xa, lơ đoan viên hơdruh tơdăm oei yuk hơlâu lơ̆m tơdrong năm jang tơ̆ teh đak đe, hŏk hơlen khua hŏk kih thuơ̆t vă ‘măn choh jang xa... Pơmai Y Za Nhi, 28 sơnăm, oei tơ̆ thôn Mô Bành 1, xah Đăk Na, apŭng Tu Mơ Rông tơroi thoi âu: “Athei sơkơ̆t hơdah vă bơ̆n gơh đei tơdrong hơrih sơđơ̆ng, mŭk drăm hơtŏk tơ-iung, mă kăl noh đe mơlôh hrei âu athei pơ-‘nam hŏk hơlen, pơm jang vă hơtŏk mŭk drăm unh hnam. Đe mơlôh nĕ chă gơnơm mă athei găn hloh tơnap tap, nĕ kơ hơlah, băt xa yua noh ưh layơ đei tơdrong hơrih sơđơ̆ng ôh. Inh vă pơtrruh nơ̆r hăm đe boăl mơlôh athei băt tơchĕng, pơ-‘nam pơm jang pơyua ăn unh hnam, athei hơdrin tôm tơdrong vă bơ̆n gơh đei tơdrong hơrih jơnap nhen rim bơngai nai”.