Ƀlep ƀât tơbăt 62 sơnăm Năr Khul linh kanh sat tang găn unh xa, pĭt unh xa păng dŏng tơgŭm bơngai răm, 22 sơnăm Năr đĭ đăng kon pơlei vang tang găn unh xa păng pĭt unh xa, gơmăng hei (28/9), tơ̆ Hnam jŏh hơri hơxoang Bơ̆ jang tơbôl Việt Xô pơgơ̆r tơdrong jang “Đĭ đăng kon pơlei vang tang găn unh xa, pĭt unh xa păng dŏng tơgŭm bơngai răm” yoa Anih tơm vei lăng Công an jang hơdoi hăm Anih pơdăh tivi Việt Nam pơgơ̆r. Kơdră Quốc hội Vương Đình Huệ vang truh akŏm tơ̆ âu.

Lơ̆m jơ pơgơ̆r hlôi pôk pơ ư dôm tơdrong jang ‘lơ̆ng, dôm tơdrong jang kơtang nuih mơng, dôm tơdrong jơnei tôch hơiă đơ̆ng khul linh păng kon pơlei lơ̆m tơdrong tang găn unh xa, pĭt unh xa păng dŏng tơgŭm bơngai răm, ƀlŏk hơdơ̆r truh kon pơlei răm đơ̆nh unh xa, tơƀôh đon bơnê hăm đe kăn ƀô̆, linh păng kon pơlei nuih mơng, chu hŭt hơkâu vă pĭt unh xa, dŏng ăn bơngai răm khei ‘năr âu ki. Tơ̆ hơnăp kơnh, tơdrong unh xa đôh, tơdrong sar bar rŏ năng oei đei tôch hơmơt, ưh kơ ê, kơna athei kŏm jơhngâm bơ̆ jang mă ‘lơ̆ng tơdrong jang tang găn, pĭt unh xa păng dŏng bơngai răm, pơm lăp hăm tơdrong ‘mĕh vă tơ̆ yăn âu vă vei lăng sơđơ̆ng ‘lơ̆ng ăn đĭ đăng tơpôl.