Ƀlep ƀât tơbăt 78 sơnăm Năr Kăch mang khei 8 tơblăh iŏk jơnei păng năr Quốc khánh 2/9, tơ̆ apŭng sơlam Ngọc Hồi, Khul druh dăm Việt Nam dêh char Kon Tum jang hơdoi hăm Khul kơdră pơgơ̆r Khul jang tơgŭm kơ tĕh đak tơ̆ tơring Tây Nguyên pơgơ̆r tơdrong jang “Inh ‘mêm kơ tĕh đak” sơnăm 2023.

Tơdrong jang tưk tơiung jơhngâm đon chu năm jhang yoa tơpôl păng roi tơƀôh nơ̆r tơbăt găh jơhngâm đon ‘mêm kơ pơlei pơla, tĕh đak đơ̆ng chăl mơlôh. Tơdrong jang “Inh ‘mêmn kơ tĕh đak” sơnăm 2023 đei lơ tơdrong jang tôch hơiă hăm tơdrong vang akŏm đơ̆ng hlŏh 400 ‘nu đoàn viên, druh dăm truh đơ̆ng 6 tơring: Đăk Lăk, Gia Lai, Đăk Nông, Lâm Đồng, Phan Thiết păng Kon Tum.

 Tơ̆ plei Đăk Mế, xăh Pờ Y, apŭng Ngọc Hồi, kŭm hăm pơgơ̆r hơri hơxoang, tơƀâp băl, ngôi pơchơt hăm kon pơlei B’râu, dôm khul grŭp oei hơpăh 100 tơpu tơmam pơyoa ăn tơdrong arih xa ăn unh hnam tơnuh; hơpăh 250 tơpu tơmam đei bơ̆n ba lô, hla ar chih, tơmam hŏk pơhrăm tơgŭm ăn đe hŏk tro vă mât hŏk lơ̆m sơnăm hŏk ‘nao, akŏm đĭ đăng tơmam truh 114 triu hlak. Ƀlep ƀât ‘măng mă âu, Khul kơdră pơgơ̆r Khul jang tơgŭm kơ tĕh đak tơring Tây Nguyên hơpăh 400 tơđăh ‘long mắc ca ăn dôm unh hnam tơnuh bơngai kon kông vă tơgŭm ăn dôm unh hnam adrin choh jang xa, dar dĕh tŏk klăih đơ̆ng tơnuh hin.