Truh dang ei, Tơdrong vă man trong tih renh Vạn Ninh (Quảng Bình) - Cam Lộ (Quảng Trị) hlôi keh đang jê̆ 45km drơh trong, đei jơnei jê̆ 72%. Lơ̆m anih ming man dang ei đei 70 tŏ gơng pơtoi jăl trong, trong trôm hăm jê̆ 660 kơmăi kơmŏk păng hloh 1.500 bơngai jang.

Tơgenh ah tŏ ‘mi kial sơđơ̆ng, tơmam ming man oei đei, dôm anih iŏk ming man tŏk bŏk oei hơtŏk tenh tơdrong man păng pơtruh dôm tơmam drăm tam mă mah pơtêng hăm tơlĕch tơchơ̆t. Kơdră dêh char Quảng Bình păng dêh char Quảng Trị sơkơ̆t gô keh đang tơdrong hrŭ ‘mong teh tơmăn jih trong lơ̆m khei 7 âu, vă anih iŏk ming man gơh pơtơm ming man ƀônh ƀŏ hloh. Đơ̆ng rŏng kơ khei năr âu, gô pơgơ̆r dôm anih iŏk ming man dah iŏk teh kăl ming man kiơ̆ nhen tơchơ̆t. Mưh jang tơnăp, Tơdrong ming man trong tih kơdâu renh Vạn Ninh - Cam Lộ gô et hơtŏk trŏ ah tơbăt năr 30/4 sơnăm 2025.