Đei tơlĕch jang đơ̆ng ‘năr 10/7 truh dang ei, Tơdrong jang Druh dăm năm tơgŭm pơyan he rơgŏh ‘lơ̆ng dêh char Dak Lak sơnăm ‘nâu đei pơgơ̆r tơ̆ 9 xăh, thĭ trơ̆n găh 7 apŭng lơ̆m dêh char. Lơ̆m 15 năr âu ki, khul druh dăm năm jang tơgŭm kơ dêh char pơih 28 lăm hŏk pơyan he ăn 700 ‘nu hŏk tro jăl 1 păng jăl 2; 1 lăm xoă mu chư ăn kon pơlei tơ̆ xăh Ea Hiu, apŭng Krông Pach.

Pơgơ̆r 93 ‘măng hŏk hôp ăn đe druh dăm, pơgơ̆r hơri hơxoang tơ̆ dôm pơlei pơla; tơmât hơdai trong roi tơbăt dôm trong jang, tơdrong tơchơ̆t đơ̆ng Đảng, khôi luơ̆t tĕh đak, vei lăng rơgŏh ‘lơ̆ng cham char; roi tơbăt găh jơhngâm pran mưh rơnĕh kon ăn druh dăm, trong tang găn rơnĕh kon lơ, tang găn tơdrong pơm glăi lơ̆m tơpôl. Bơ̆ jang 17 tơdrong jang đơ̆ng đe druh dăm nhen: Tơ̆k hơdăh trong pơlei, sơng hơmet hnam hŏk hôp tơpôl; kôch hơmet hơbong đak, pơtăm pơkao tơter trong, pơjing pơgar pơkao kơ đe druh dăm.