Vang truh akŏm đei lơ kon pơlei Jeh- Triêng tơ̆ plei Nông Kon pơma hơdrô̆ păng xăh Đăk Dục pơma atŭm vang ngôi pơchơt, tôn chĭng- hơxoang; thi pơm, pai ƀĕng chưng; chă hơlen năng, roi tơbăt Tết so kơ hơdrĕch hơdrung; ngôi pơchơt hơdai jŭm dăr pla unh rŭk ƀât cham rông…

Ƀlep ƀât ‘măng mă âu, hăm hơnăp jang đơ̆ng anih pơgơ̆r, Anih chĕp kơ̆l pơgơ̆r Ƀô đô̆i vei lăng tơring sơlam dêh char Kon Tum pơm lêh et hơtŏk, pơjao Rông plei Nông Kon. Rông plei Nông Kon đei pơm ming kiơ̆ thoi rông so kơ bơngai Jeh - Triêng, akŏm đĭ đăng jên pơm vă jê̆ 145 triu.

Tơ̆ tơdrong jang “Pơyan Puih mak tơring sơlam pơhiôk jơhngâm kon pơlei”, Anih chĕp kơ̆l pơgơ̆r Ƀô đô̆i vei lăng tơring sơlam Kon Tum jang hơdoi hăm lơ anih jang, hơpăh 600 blăh hla kơ teh đak ăn kon pơlei tơ̆ tơring sơlam Đăk Dục; hơpăh 1 pôm hnam đei kơjă 50 triu hlak jên, 30 tơpu tơmam ăn unh hnam đei kŏng, unh hnam tơnuh; hơpăh Hla ar hôn bơnê, tơmam đơ̆ng Anih chĕp kơl pơgơ̆r khul linh vei lăng tơring sơlam ăn 10 ‘nu mon găh Tơdrong jang “Chông ba oh năm hŏk” hŏk gơ̆h hơgei...