Dôm năr âu, tơ̆ anih ming man trong tih Khánh Hòa – Buôn Ma Thuột jăl găn xah Ea Knếc, apŭng Krông Pắk (dêh char Đăk Lăk), dôm jĭt tong gre, kơmăi kơmŏk păng lơ bơngai jang hăt hot oei pơm trong. Ƀok Hồ Văn Anh, bơngai hloh 20 sơnăm tơguăt hăm tơdrong jang vơ̆r gre kôch teh tuh tơƀenh vă pơm trong đơ̆ng Kŏng ti An Nguyên (Đăk Lăk) anih iŏk ming man jăl trong tih tơroi, kơdih po ưh kơ băt hơdah âu noh têt mă dôm athei sơng puih mak hơtaih đơ̆ng unh hnam păng ‘nhŏng oh. Têt âu, ƀok păng khul jang adoi đei kŏng ti pơgơ̆r xa têt tơ̆ anih ming man. Tơ̆ hnam pơm jang, đe kơdră kŏng ti hlôi akŏm đei kơmang plei ‘long, đei pơkao mai, pơkao đao păng đei tôm ƀanh tơyông, ƀanh kĕo păng tơmam xa nhen tơ̆ hnam vă rim bơngai sơng puih mak... Ƀok Hồ Văn Anh tơroi: “Kŏng ti sơkơ̆t hăm anih iŏk ming man athei vei sơđơ̆ng tơdrong ming man, noh hơdrol kơ Têt hlôi hŏk hôp ‘nhŏng oh tơ̆ anih ming man jăl trong. Đe kơdră kŏng ti chih akŏm khei năr jang lơ̆m Têt kiơ̆ pơkăp ‘nhŏng oh chih măt pơm jang. Nhôn hŏk hôp rim bơngai păng drơ̆ng nơ̆r hăm unh hnam gô chih măt oei pơm jang lơ̆m dôm năr Têt hloi, dang đơ̆ng năr 26/12 âm lĭch truh năr 6/1 Têt, hơdrô̆ pơdơh ah năr 1 Têt đĕch.”

Anih jang An Nguyên (Đăk Lăk) tŏk bŏk oei pơm jang sơkơ̆t jang kơsô̆ 3 đơ̆ng Km 101 + 500 truh Km 108 + 00. Ƀok Lê Quốc Thắng, phŏ Kơdră pơgơ̆r tơdrong ming man kơ Anih jang An Nguyên ăn tơbăt, đơ̆ng rŏng kơ iŏk đei anih ming man đơ̆ng Anih jang vei lăng kon pơlei apŭng Krông Păk ah jăl 4/2023, anih jang mŭk drăm hlôi akŏm lơ tơmam drăm, kơmăi kơmŏk păng bơngai jang pơtơm pơm jang. Dang ei đei pơhlom 30 đei kơmăi kôch teh, kơmăi chôk teh, gre ben, gre lu păng pơhlom 40 – 45 bơngai jang asong jing 2 khul jang ah kơ ‘năr păng kơmăng chă chôk kôch teh tơmăn păng man jrăng drơh trong. Lơ̆m Têt Giáp Thìn 2024 âu ki, vă vei sơđơ̆ng tơdrong jang kơ anih jang mŭk drăm gơh sơđơ̆ng lơ̆m têt, rim tơdrong tơgŭm ăn bơngai jang hlôi đei anih jang pơm jang tơnăp. Ƀok Lê Quốc Thắng tơroi: “Đơ̆ng năr 26/12 âm lĭch truh năr 6/1 Têt, ‘nguaih kơ tơdrong jô̆ hơlen hơpah kiơ̆ tơchơ̆t đơ̆ng teh đak pơm jang lơ̆m dôm năr pơdơh lêh têt, anih jang hơpah ăn minh ‘nu bơngai jang 1 trĭu hlj minh năr jang. ‘Nâu jing tơchơ̆t hơlêm pơchhơp jơhngơ̆m bơngai jang, rim bơngai kơyuơ kơ kŏng ti noh kŏng ti adoi kơyuơ rim bơngai”

Tơdrong ming man trong tih Khánh Hòa - Buôn Ma Thuột hơtaih pơhlom 117,5 km pơtoi dêh char Khánh Hòa – Đăk Lăk. Kơsô̆ jên asong jang noh 21.935 tih hlj đơ̆ng jên mong teh đak. Tơdrong ming man đei asong jing 3 tơdrong jang, tơdrong jang kơsô̆ 1 kơyuơ dêh char Khánh Hòa pơgơ̆r, tơdrong jang kơsô̆ 2 kơyuơ Anih tơm jang gah trong nơnăm ming man; oei tơdrong jang kơsô̆ 3 kơyuơ dêh char Đăk Lăk iŏk jang. Tơdrong jang âu đei dêh char Đăk Lăk pơjao ăn Jơnŭm pơgơ̆r Tơdrong ming man trong nơnăm păng choh jang xa hơtŏk tơring tơrang dêh char iŏk ming man.  

Ƀok Đặng Thọ Dần – Phŏ Kơdră Anih jang gah trong nơnăm Jơnŭm pơgơ̆r ming man trong tih, bơngai kơtă hơlen tơdrong jang kơsô̆ 3 ăn tơbăt, dang ei dôm anih iŏk ming man tŏk bŏk tenh kuăng iŏk jang dôm tơdrong jang nhen chôk tơmăn teh, man drơh jrăng gơng găn đak glung âu to... Lơ̆m dôm năr Têt Giáp Thìn 2024 âu ki, dôm anih jang adoi chih măt jang hloi lơ̆m dôm năr têt, Anih pơgơ̆r jang pơkăl dôm tơ-‘ngla anih jang mŭk drăm vei sơđơ̆ng tơdrong pơm jang, tơdrong ‘lơ̆ng ming man, noh athei tơrĕk kăp gĭt ăn bơngai jang ming man trong nơnăm kiơ̆ tơchơ̆t: “Dang ei, đơ̆ng rŏng kơ anih teh tơmăn man trong keh đang bơih noh dôm anih asong jang hlôi akŏm kôch teh vă man trong vih vơ̆t kăl lơ̆m anih jang. Nhen tơdrong jang kơsô̆ 1 noh 100% hlôi đei trong man keh đang. Oei tơdrong jang kơsô̆ 2 noh adoi keh đang đei hloh 70%. Tơdrong jang kơsô̆ 3 adoi keh đang gơh vih vơ̆t păng tŏk bŏk đei tơlĕch ming man hăt hot”.

Kiơ̆ tơlĕch jang truh sơnăm 2030, sơkơ̆t lăng truh sơnăm 2050, jăl trong tih âu gô jing jăl trong dơnơm vă pơjing minh lơ̆m 5 trong jang mŭk drăm kơ tơring Tây Nguyên, hăm tơdrong tơchơ̆t ‘măn ăn tơdrong jang tĕch pơdro, tơmang pơhiơ̆ păng chơ pơdŭ tơmam drăm. Đei pơtơm man đơ̆ng khei 6 sơnăm 2023, dang ei jăl trong tih Buôn Ma Thuột - Khánh Hòa hlôi jê̆ keh đang. Dôm tơdrong ming man jăl trong vih vơ̆t lơ̆m tơring Tây Nguyên, dôm tơdrong jang tơroh tơring hăm dih băl đei tơlĕch jang kơtang, dar deh pơtoi dôm tơdrong jang mŭk drăm kơ rim dêh char, kơ tơring păng kơ jâ̆p tơring Tŏk bŏk - Tây Nguyên, pơjing jơhngơ̆m pran vă drŭt hơtŏk mŭk drăm tơpôl.