Tơdrong âu pơkăl anih jang kơpal, tơpôl păng unh hnam athei kơchăng hloh dơ̆ng lơ̆m tơdrong vei lăng đe hơ-ioh, mă kăl noh lơ̆m khei tŏ ‘mi. Đơ̆ng blŭng sơnăm truh dang ei, tơ̆ dêh char Gia Lai đei ƀôh 7 ‘măng lôch glơ̆k tơ̆ đak pơm 10 ‘nu hơ-ioh lôch hơchăng.

Lơ̆m noh tơdrong lôch glơ̆k tơ̆ đak ƀôh lơ tơ̆ dôm apŭng Krông Pa, Đăk Đoa, Kbang. Bơngai ƀơm sar bar mă lơ noh đe hơ-ioh oei lơ̆m sơnăm năm hŏk tơ̆ hnam trưng, hơnơ̆ng năm tơ̆ mir na, đak krong vei kơpô rơmo tơgŭm mĕ ƀă. Ƀok Phạm Trần Anh, Phŏ Kơdră Anih Asong jang Linh jĭ rơka păng Tơpôl dêh char Gia Lai akhan, atŭm hăm tơdrong hơtŏk hlôh vao păng pơtho hơ-ioh gơh vei sơđơ̆ng lơ̆m tơring đei đak, rim unh hnam adoi kăl vei lăng tơnăp tơdrong pơchơt ăn đe hơ-ioh, mă hăt noh ah pơyan tŏ ‘mi.