Ƀok K’Ních, kơdră buôn Dur1, xah Dur Kmăl, apŭng Krông Ana, dêh char Đăk Lăk, ƀrơ̆k kơ jơhngơ̆m păng pơ-ư pơ-ang ah đei tơƀơ̆p Ƀok Tổng Bí thư Nguyễn Phú Trọng tơ̆ Năr akŏm tơguăt tơguăl tôm kon pơlei kon kông sơnăm 2018. Ƀok băt hơdah tơdrong tơguăt tơjê̆, vang glơng rim tơdrong đơ̆ng bơngai kơdră kơpal hloh kơ Đảng hăm kon pơlei: “Đei tơmơ̆ng păng kơtă pơma dơnuh ah năr mă noh, inh ƀôh ƀok noh bơngai dơnưp dim, nhen kơ bơngai ƀă kră ‘mêm kơ-eng kơ po. Ƀok hơnơ̆ng tơtă noh tôm kan ƀô̆ păng kon pơlei athei tơguăt kơjăp, băt chă hơmet dôm tơdrong ưh kơ ‘lơ̆ng vă hơtŭm băl hơtŏk tơ-iung. Đơ̆ng noh truh dang ei 5 sơnăm bơih, kiơ̆ dôm nơ̆r ƀok tơtă noh kon pơlei pơm kiơ̆ tơnăp ”

Chơt hơ-iă 2 ‘măng đei tơƀơ̆p Ƀok Tổng Bí thư Nguyễn Phú Trọng lơ̆m dôm tơdrong hop akŏm gah joh ayŏ, bơngai chih văn Niê Thanh Mai, Kơdră Jơnŭm Văn hŏk Ngê̆ thươ̆t Đăk Lăk hơdơ̆r rim nơ̆r Ƀok Tổng Bí thư tơroi gah tơguăt tơguăl kon pơlei. Yă Niê Thanh Mai tơroi, dôm tơdrong mă Ƀok Tổng Bí thư pơgơ̆r ah Hop akŏm jơ̆p teh đak gah joh ayŏ sơnăm 2021 hlôi đei dêh char Đăk Lăk pơm jang hơdah: “Tơguăt tơguăl kon pơlei lơ̆m văn hŏk ngê̆ thuơ̆t păng kiơ̆ đơ̆ng văn hŏk ngê̆ thươ̆t noh nhôn hlôi chih akŏm dôm tơdrong jang, dôm tơdrong chih lơ̆m tak phâm kơ tôm đe văn ngê̆ sih; Pơm thoi yơ vă ƀôh đei sơnong păng tơdrong tơguăt tơguăl tôm kon pơlei păng mă kăl tơdrong tơguăt tơguăl, tơdrong vang jang đơ̆ng lơ khul kŏng an, ƀô̆ đô̆i, hơdruh tơdăm, đe drăkăn... Đơ̆ng rŏng kơ hop akŏm joh ayŏ jơ̆p teh đak hăm tơdrong pơgơ̆r đơ̆ng Ƀok Tổng Bí thư Nguyễn Phú Trọng noh tơpă tơdrong tơguăt tơguăl kon pơlei gô oei pơih să jơ̆p jang hloh dơ̆ng păng gô ang hơdah đơ̆ng joh ayŏ, văn hŏk ngê̆ thuơ̆t”.

Chĕp lơ̆m ti rŭp đei phĭn hơtŭm hăm Ƀok Tổng Bí thư Nguyễn Phú Trọng, yă H Yam Buôn Krông, tơ̆ pơlei Tơng Jú, xah Ea Kao, pơlei tơm Buôn Ma Thuột, dêh char Đăk Lăk sơ-‘ngon tơroi, yă chơt hơ-iă đei tơƀơ̆p Ƀok Tổng Bí thư 2 ‘măng. Mă kăl, sơnăm 2011, yă păng đe pơmai oh oei kơdih tanh ao brai Êđê ‘lơ̆ng hloh vă pôk ăn kơ Ƀok Tổng Bí thư ah ƀok hơpong pơlei pơla: “Ah kơtơ̆ng ƀok truh noh pơtơm dui brai chô̆ tơ̆ không tanh vă dah tom tanh mă keh đei ao pôk ăn kơ Ƀok, pơtruh jơhngơ̆m đon ‘mêm băt, tơdrong tơgĭt kơdih po hăm Ƀok. ‘Măng mă 2 tơƀơ̆p Ƀok  noh ah inh năm Hop akŏm pôk bơnê kơ dôm bơngai hŏk kơjung, jang hơgei păng bơngai kon kông đei kon pơlei lui yom tơ̆ Hà Nội. Inh tơgĭt kơ dôm nơ̆r Ƀok tơtă hăm kon pơlei kon kông pơma hơdrô̆ păng jơ̆p teh đak pơma hơtŭm, athei pơjing tơdrong tơguăt tơguăl, đei tơguăt tơguăl pơtơm đei tơdrong jơnei”.

Ƀok Hà Ngọc Đào, sơ̆ jang Kơdră Anih Pơtho Pơhrrăm Đăk Lăk ăn tơbăt, sơnăm 2011, khei năr mă Ƀok Tổng Bí thư Nguyễn Phú Trọng pơtơm iŏk sơnong jang gĭt pơgơ̆r Đảng, adoi nhen khei năr hơmet ăn Tơdrong jang tơplih ‘nao dơnơm tôm tơdrong gah pơtho pơhrăm. Hăm lơ tơdrong pơgơ̆r jang tơnăp đơ̆ng Ƀok Tổng Bí thư, truh dang ei, đơ̆ng rŏng 10 sơnăm pơm kiơ̆ Tơchơ̆t 29-NQ/TW, pơtho pơhrăm teh đak bơ̆n hlôi đei lơ hơyak hơtŏk pran păng đei jơnei lơ tơdrong kăp gĭt, mă kăl noh lơ̆m tơring kon pơlei kon kông, tơring sơlam teh, achon đak dơsĭ. Vă tơgăl hăm tơdrong lui ‘mêm đơ̆ng Ƀok Tổng Bí thư ‘măn ăn tơdrong pơtho pơhrăm, ƀok Hà Ngọc Đào tơroi: “Ƀok Trọng lôch hiong jing minh tơdrong hiong tih tên hăm teh đak. Kơdih inh ƀrơ̆k kơ jơhngơ̆m, ơh ‘mêm kơdêh. Jing đảng viên inh lui hăm Ƀan Châ̆p hanh Trung ương Đảng gô vơ̆r pơgơ̆r duk găn hloh tơnap tap âu. Dang ei athei pơjing tơdrong ‘mêm băt jing jơhngơ̆m pran lơ̆m tơdrong pơm jang. Kon pơlei lui kơ Đảng, tơguăt tơguăl tôm bơngai nhen minh, tơguăt tơguăl tôm kon pơlei, tơguăt tơguăl lơ̆m Đảng, tơguăt tơguăl lơ̆m tơpôl kon pơlei nhen tơdrong mă Ƀok Trọng hơpơi ‘meh  lơ̆m khei năr oei hơrih”.

Băt hơdah nơ̆r Ƀok Tổng Bí thư tơtă lơ̆m Năr akŏm Tơguăt tơguăl tôm kon pơlei tơ̆ Đăk Lăk ah sơnăm 2018, ƀok Y Giang Gry Niê Knơng, Kơdră Anih jang Măt trâ̆n tôh kuôk Tổ quốc Việt Nam dêh char Đăk Lăk tơroi: “Ƀok Tổng Bí thư Nguyễn Phú Trọng hơnơ̆ng lăng tơdrong tơguăt tơguăl jing tơdrong kăp gĭt hloh, jing tơdrong tơm kơ jơhngơ̆m pran kơ teh đak. Pơm kiơ̆ nơ̆r đơ̆ng Ƀok Tổng Bí thư, Anih jang Măt trâ̆n tôh kuôk Việt Nam dêh char Đăk Lăk pơtoi pơm jang đei jơnei tơdrong akŏm tơguăt tôm kon pơlei, tơguăt kon pơlei kon kông, dôm tơdrong khop, atŭm jơhngơ̆m tơpôl, pơjing pơlei pơla pơdrŏng ‘lơ̆ng, gơh hơgei, ƀenh kơ um ai kơdih”.