‘Nau ‘noh sơnăm mă 9 tơdrong pơgơ̆r “Vang hơlêm ƀok thây kô pơtho” đei pơgơ̆r. Mĭnh lơ̆m dôm tơdrong jang kăl ‘noh ‘măng năm ngôi hăm rim ƀok thây kô oei tơ̆ tơring tơnap tap rim tơring I, tơring II, tơring III găh tơring kon kông păng groi kông.

Tơdrong pơgơ̆r “Vang hơlêm ƀok thây kô pơtho” kơ yuơ Trung ương Khul Hơdruh tơdăm Việt Nam iung jang hơdoi hăm Hơnih tơm vei lăng Hnam trương pơtho pơhrăm, Hơnih vei lăng Kon kông păng Grŭp jang Tiên Long pơgơ̆r blŭngh a lơ̆m sơnăm 2015, truh dang ei, tơdrong jang au hlôi pôk pơ ư 458 ‘nu ƀok thây kô hơgei đei lơ tơdrong tơgop lơ̆m pơtho pơhrăm hŏk tro tơ̆ tơring, pơjing đei hơ iă ‘lơ̆ng hơ iă găh tơdrong ‘lơ̆ng păng hơgei lơ̆m pơtho pơhrăm; đei jơhngơ̆m đon hơdrin kơtang yak hloh tơnap tap, mĭnh jơhngơ̆m đon hăm tơdrong jang pơtho pơhrăm, đei hŏk tro, mĕ ƀă hŏk tro, kon pơlei ‘mêm kơ eng.