Tơ̆ Kŏng ti Thep Asean lơ̆m Anih jang kŏng ngĭp Hòa Phú, dôm anih jang kơmăi kơmŏk hlôi pơm jang tơnăp. Kiơ̆ kơ yă Lê Thị Tuyết Hạ, Phŏ Kơdră dơnơm kŏng ti, pơhlom 600 bơngai jang hlôi pơm jang lơ̆m dôm năr blŭng sơnăm.

Kŏng ti adoi iŏk đei lơ anih chih măt răt tơmam drăm, hơpơi ‘meh đei dôm tơdrong pơtơm ‘lơ̆ng hơ-iă lơ̆m sơnăm 2024: “Đơ̆ng rŏng tôch năr pơdơh pơchơt, năr pơtơm iung pơm jang adoi tôm tong, blŭng sơnăm noh Jơnŭm pơgơ̆r anih jang adoi asong jên pŭn ai thơ thâu Têt pơtơm puih mak ăn tôm ‘nhŏng pơmai oh. Jơnŭm pơgơ̆r adoi hơpơi ăn tơdrong tĕch răt đei yua tơnăp hloh, dôm tơdrong pơm jang adoi đei lơ kŏng ti pơm jang tĕch pơdro sơđơ̆ng vă bơngai jang đei tơdrong jang, đei yua sơđơ̆ng hloh”.

Adoi lơ̆m dôm năr blŭng sơnăm Giáp Thìn, Kŏng ti sĭt mei Lực Thiêm tơ̆ Anih jang Kŏng ngĭp Tân An 2 hlôi iŏk đei lơ chih măt răt tơmam drăm. Ƀok Trần Trí Vỹ, Kơdră Kŏng ti ăn tơbăt, 1.000 bơngai jang chôt vih pơm jang, lơ̆m noh 95% noh bơngai kon kông păng 90% noh drăkăn. Dang ei, Kŏng ti tŏk bŏk hăt hot iŏk bơngai jang păng pơih să anih jang vă tơtom pơm tơlĕch đei tơmam drăm tĕch ăn kơ đe: “Ah năr 10 noh Anih jang mŭk drăm pơtơm pơm jang, năr jang mă blŭng noh tôm bơngai truh pơm jang đei 98%. Sơnăm âu, đe chih măt răt tơmam lơ hloh sơnăm hơdrol ki pơhlom 20%, tơdrong mă âu pơjing jơhngơ̆m pran ăn anih jang mŭk drăm kĕ hơtŏk tơ-iung tenh hloh dơ̆ng. Dang ei, Kŏng ti tŏk bŏk oei iŏk bơngai jang, gah bơngai jang tơ̆ tơring noh lơ, dang ei đei 1 rơbâu bơngai jang. Lơ̆m jăl 1 âu, anih jang gô iŏk 300 bơngai jang dơ̆ng vă pơtrŏ hăm tơdrong kăl răt tơmam drăm kơ anih jang po”.

Tơdrong sô̆ hơ-iă đơ̆ng anih jang mŭk drăm hlôi tơgŭm ăn rim bơngai jang sô̆ hơ̆k lơ̆m jơhngơ̆m hloh ƀơ̆t năm jang lơ̆m dôm năr blŭng sơnăm ‘nao.

Pơmai H’Theo Triết tơ̆ pơlei Jun, xah Yang Tao, apŭng Lăk, dang ei jang kŏng nhơ̆n tơ̆ Kŏng ti sĭt mei hơbăn ao Lực Thiêm ăn tơbăt, gô hơdrin jang tơnăp tơdrong jang po vă hơtŏk iŏk yua lơ hloh: “Đơ̆ng mă inh mơ̆t jang tơ̆ kŏng ti, tơdrong hơrih inh đei hơtŏk hloh păng tơdrong pơyua đơ̆ng Kŏng ti adoi tơnăp. Têt đang inh ƀôh rim bơngai chơt hơ-iă sơđơ̆ng jơhngơ̆m pơtoi pơm jang”.

Kiơ̆ kơ ƀok Nguyễn Kim Tùng, Kơdră Jơnŭm pơgơ̆r Anih jang kŏng ngĭp Tân An, dang ei Anih jang kŏng ngĭp đei 73 anih jang mŭk drăm tŏk bŏk oei pơm jang, pơm jang đei tôm 100%. Dôm năr blŭng sơnăm 2024 tơdrong pơm jang tơ̆ dôm anih jang đei ƀôh hăt hot hăm tơdrong pơkăp hơtŏk pơ-‘lơ̆ng tơmam drăm: “Truh khei năr âu noh 100% anih jang mŭk drăm pơtơm jang ah puih mak bơih păng khul bơngai jang hơdrol kơ Têt, đơ̆ng rŏng kơ Têt ưh đei tơplih ôh păng pơm jang kiơ̆ trŏ tơlĕch truh ah jăl 1 păng jăl 2 hơtŏk đei 2 rơbâu bơngai jang. Blŭng sơnăm ƀôh hơdah tơring jang kŏng ngĭp, đe kan ƀô̆ bơngai jang hăt hot hăm tơdrong jang. Adoi hơpơi ‘meh lơ̆m sơnăm 2024 mŭk drăm pă đei ƀơm tơnap tap bơih păng rim bơngai pơm jang tơnăp păng pơyua ăn tơdrong hơrih kon pơlei tơ̆ âu gơh sơđơ̆ng hloh”.

Puih mak  2024 hăm dôm tơdrong hơ-iă truh hăm anih jang mŭk drăm, bơngai jang tơ̆ Đăk Lăk hơ-‘nhăk truh đon lui, tơdrong hơpơi ‘meh gah dôm tơdrong đei jơnei ‘nao lơ̆m hơtŏk mŭk drăm tơpôl, hơtŏk tơdrong hơrih kon pơlei.