Hơdai hăm jơ̆p tơring lơ̆m tĕh đak, 8 jơ pơgê 18/7, Khul pơgơ̆r thi tốt nghiệp THPT sơnăm 2023 dêh char Kon Tum roi tơbăt điêm thi tốt nghiệp kiơ̆ nơ̆r athei đơ̆ng Anih tơm vei lăng pơtho pơhrăm. Kiơ̆ kơ ‘nŏh Kơsô̆ hŏk tro đŏu tốt nghiệp THPT sơnăm ‘nâu tơ̆ dêh char Kon Tum đei 98,74% tŏk 1,0% pơtêng hăm sơnăm 2022. Điêm jô̆ păh lăp hăm rim môn thi tốt nghiệp đei 6,19 điêm.

Kơsô̆ chih jô̆ đơ̆ng Anih tơm vei lăng pơtho pơhrăm ăn ƀôh, dêh char Kon Tum tŏk 6 ƀơ̆k găh điêm jô̆ păh lăp lơ̆m tơdrong thi tốt nghiệp THPT sơnăm 2023 pơtêng hăm sơnăm 2022, dơ̆ng mă 2 lơ̆m tơring Tây Nguyên. ‘Măng thi tốt nghiệp THPT sơnăm 2023 pơgơ̆r đơ̆ng ‘năr 28-29/6/2023 dêh char Kon Tum đei 5.028 ‘nu hŏk tro vang thi, lơ̆m nŏh đei hlŏh 1.700 ‘nu hŏk tro bơngai kon kông. Hŏk tro thi vă iŏk ƀăng tốt nghiệp THPT ‘nŏh 4.843 ‘nu. Lơ̆m dêh char đei 12 anih thi tơpă hăm 224 lăm thi. ‘Măng thi đei năng pơgơ̆r sơđơ̆ng ‘lơ̆ng, tơpăt păng trŏ hăm tơdrong hơgăt.