Tiến sĩ Trương Thanh Tùng, Kơdră Khul chă tơchĕng hơlen pơgang ‘nao (Hơnih tơm chă tơchĕng hơlen gơ̆h hơgei Phenikaa), ƀok thây pơtho Khoa Dược, Hnam trương Đăi hŏk Phenikaa (Hà Nội), ‘nŏh jĭ bơngai kăl hloh lơ̆m khul rim bơngai khoa hŏk sơnăm mơlôh kơ Việt Nam păng apŭng plĕnh teh, kơ yuơ ‘nhŏng ‘nŏh hlôi đei lơ trong chă tơchăr khoa hŏk gơ̆h hơgei hơtŏ lơ̆m apŭng plĕnh teh. Mĭnh lơ̆m dôm tơdrong ‘nŏh đei tơdrong tơchăr lăng truh pơjing đei pơgang ‘nao hơmet dôm tơdrong jĭ tơpoh. Mă kăl, đơ̆ng rŏng lơ sơnăm hŏk pơhrăm păng chă tơchĕng hơlen tơ̆ teh đak đe, Tiên si Trương Thanh Tùng rơ̆ih trong brŏk vih hơrih sa tơ̆ pơlei pơla păng vang tơgop jơhngơ̆m đon. Kiơ̆ đơ̆ng Tiên si Trương Thanh Tùng, nhen Ƀok Hô hlôi pơma: Hơdruh tơdăm ‘nŏh dôm bơngai tơngla hơnô̆ hơnăp kơnh kơ teh đak. Kơ yuơ lơloh, ‘nhŏng ‘meh vă brŏk vih tơ̆ pơlei pơla, jang kiơ̆ dôm tơdrong hlôi đei hŏk pơhrăm tơ̆ rim teh đak đe gơ̆h hơgei, chă tơchĕng hơlen, pơm tơlĕch rim pơgang ‘nao tơplih ăn pơgang khanh sinh so. Tiên si Trương Thanh Tùng, Đăi hŏk Phenika Hà Nội tơbăt ăn dôm trong chă tơchĕng hơlen rim pơgang khang sinh: “Ĭnh ‘meh vă bơngai Việt Nam bơ̆n lơ̆m hơnô̆ hơnăp kơnh pă hli tơdrong iŏk yua lơ pơgang khanh sinh bơih. Adoi nhen tơdrong chă rơ̆ih trong anai, iŏk yua dôm pơgang mă nhôn pơm tơlĕch vă hoei kơ lơn pơgang, dŏng kĕ ăn dôm bơngai jĭ lơn pơgang. Trong chă tơchăr mă 2 mă nhôn tŏk bŏk jang ‘nŏh chă tơchĕng hơlen rim pơgang kĕ ming hơmet jĭ ôm sĕch pham (ung thư). Tơdăh gơ̆h chă tĕch mơdro lei gô pơm tơjur ƀiơ̆ kon jên ming hơmet jĭ ăn dôm bơngai jĭ ôm sĕch pham, ming hơmet jĭ ôm sĕch pham ‘lơ̆ng hlŏh, pơm ăn bơngai jĭ hơrih sot hloh ƀiơ̆ dơ̆ng adoi nhen hăp ưh kơ đei pơnhul”.

Hăm bơngai joh hơri sơnăm mơlôh Nguyễn Thị Ngọc Hà (hơnăn ư̆ Hà Myo) ling lang tơchăr hơgei, hơgrop tơdra joăt joe sơ̆ ki hăm Rap păng nhak điên tư EDM, hơnhăk tơdrong jŏh hơri joăt joe sơ̆ ki truh hăm bôl boăl mơlôh lŭ lăp hlŏh. Tơdrong mă Ngọc Hà ‘meh vă hloh ‘nŏh, gơ̆h hơnhăk tơdrong jŏh ayŏ kơdŏ soang Việt Nam druh kiơ̆ tom hăm rim teh đak gơ̆h hơgei lơ̆m apŭng plĕnh teh nhen Ƀok Hô hơpơi ‘meh vă, vă bôl boăl apŭng plĕnh teh ƀôh mĭnh Việt Nam gơ̆h hơgei, vang mơ̆t hơdoi, mă lei oei gei kơjăp tơdrong oei sa joh ayŏ kơdih kơ teh đak bơ̆n. Tơbăt găh dôm tơdrong hơdrin lơ̆m tơdrong hơgrop hơri Xẩm hăm Rap păng nhak điên tư EDM, Nguyễn Thị Ngọc Hà tơbăt: “2 sơnăm au ĭnh ‘măn jơ ‘năr hŏk pơhrăm mĭnh ƀar tơdrong joh hơri kră sơ̆ Việt Nam. Lơ̆m au đei hơri Xẩm, hơri Xoan Phú Thọ, tơdrong hơri kră sơ̆ Nam Trung Bộ păng mĭnh ƀar tơdrong jŏh hơri rim hơdrung kon kông kơ Việt Nam. Ĭnh hlôi hơnhăk ba ăn bơngai mơ̆ng mĭnh ƀar ƀai hơri găh ƀai hơri, găh hơri Xẩm păng Xoan Phú Thọ ‘nŏh đei “Tơdrong pơchơt ĭ a yang asong”; tơdra hơri Mường hăm hơnăn “Đập nàng Khọt. Tơdrong mă ĭnh ‘meh vă hloh ‘noh hơnhăk tơdrong joh hơri sơ̆ ki kơ Việt Nam truh hăm lơ bơngai chă mơ̆ng hloh dơ̆ng păng ĭnh jei đei jơhngơ̆m đon hơpơi ‘meh vă năm hơri tơ̆ teh đak đe păng ƀôh tơmoi teh đak đe vang chă hơsoang dôm tơdrong joh asoang sơ̆ ki kơ Việt Nam”.

          "Tơ̆ yơ vă hơdruh tơdăm năm, tơdrong kiơ mơmat hơdruh tơdăm jang” nơ̆r chă pơtho pơkă đe hơdruh tơdăm đơ̆ng Ƀok Hô ling lang jing tơdrong pơtho khan gĭt kăl hloh ăn kơ ‘nhŏng Y Xim Ndu, hơdrung M’nông, apŭng Lăk, dêh char Đak Lăk. Lăp đơ̆ng rŏng hŏk đang Đăi hŏk, ‘nhŏng Y Xim Ndu hlôi tơchơ̆t brok vih dơ̆ng tơ̆ groi teh rang rar kơ pơlei pơla kơdih vă pơvih pơvăn tơdrong jang. Lơ̆m au, ‘nhŏng pơ̆n yak hơlau lơ̆m tơdrong jang tơmang pơhiơ̆ cham char păng tơƀôh tơbăt cham char, joh hơri, oei sa păng ‘nhot sa kơ hơdrĕch hơdrung; vei răk tơƀăk mong păng tơƀôh tơbăt tơdrong oei sa joh ayŏ joăt joe sơ̆ ki kơ hơdrĕch hơdrung, mă kăl ‘nŏh tơdrong tôn chĭng chêng Tây Nguyên. Hrei au, Hơnih mơdro sa kơ ‘nhŏng Y Xim Ndu pơjing đei tơdrong jang sa sơđơ̆ng ăn 10 ‘nu bơngai đoàn viên, hơdruh tơdăm lơ̆m tơring: “Ba ‘meh tơgĕch dôm tơdrong rơvơn hlôi đei kơ tơring găh cham char bri brăh, găh bơngai jang tơ̆ tơring. Hăm ‘meh vă mưh pơjing tơdrong jang tơ̆ tơring gô pơjing đei jơhngơ̆m đon lui yom, jơhngơ̆m pran atŏk jơhngơ̆m đon hưch hanh ăn bôl boăl mơlôh anai vang iung jang hơdoi lơ̆m tơ iung pơjing păng atŏk tơ iung mŭk drăm. Vang năm hop akŏm hơdruh tơdăm gơ̆h hơgei pơm kiơ̆ nơ̆r Ƀok Hô pơtho sơnăm 2023, ba ‘meh vă gô tơgoăt đei lơ bôl boăl mơlôh, ling lang jĭ dôm bơngai pơm jŭk yŭk trong hơlau, ling lang hŏk pơhrăm jơhngơ̆m đon ‘lơ̆ng, jơhngơ̆m đon hlôh vao vă atŭm dih băl tơgoăt tơgoăl pôm nơ̆r ƀơ̆r đon păng tơ iung pơjing, atŏk tơ iung pơlei pơla”.

‘Nau lăp 3 lơ̆m hloh 400 ‘nu hơdruh tơdăm gơ̆h hơgei, dôm bơngai ‘lơ̆ng rŏ hloh lơ̆m hŏk pơhrăm păng pơm kiơ̆ jơhngơ̆m đon ‘lơ̆ng, trong bơ̆ jang hơgei kơ Ƀok Hô vang măm Pơm lêh hop akoưm hơdruh tơdăm gơ̆h hơgei pơm kiơ̆ nơ̆r Ƀok Hô pơtho ‘măng mă 7 - Đe sư ‘nŏh dôm hơdruh tơdăm gơ̆h hơgei, hơbĕch hơbal păng đei “jơhngơ̆m đon hơpơi ‘meh vă tih tên” hăm jơhngơ̆m đon nơ̆r pơma tơngla iung jang hơdoi; hơrih sa đei tơchĕng tơ̆ hơnăp, vang tơgop ăn teh đak.