Kră pơlei Kra Jan Ha Xuyên (hơdrung K’Ho), oei tơ̆ thôn Đa Tế, tơring Đạ Mrông, apŭng Đam Rông, dêh char Lâm Đồng hlôi đei ‘măng khul lĭnh Fulro pơhlŭ pơdôr hơrih sa mơmat tat 12 sơnăm lơ̆m bri, ƀok sơ ‘nhôi sơ-‘ngon ƀôh hơdăh tơdrong mơmat tat mưh bơ̆h ƀơm jrok trong, pơm tơdrong kơtrŏ kơƀlep: “Sơ̆ ba hơrih sa lơ̆m bri 12 sơnăm pơngot rơvĕt tơngiĕt găng, mơmat tat hrăt hrĭn năm tơchă phĕ pai sa hla ‘nhot ƀum bri vă pai sa kơ ‘năr, jĭ jăn hơnơ̆ng dơ̆ng. Mư̆h ĭnh chôt vih hơrih sa hăm pơlei pơla dơ̆ng ‘nŏh đei Đảng, Teh đak, kơdră chĕp pơgơ̆r tơring jei pơjing rơvơn ăn kơ ĭnh đei tơdrong jang, kon hơ-‘lơ̆p đei hŏk pơhrăm. Gơnơm kơ Đảng, Teh đak tơgum djru ăn kơ ĭnh bơ̆ jang teh đak, dang ei ĭnh hlôi đei hnam oei sơđơ̆ng, đei gre chă yơyak hiôk hian, mŭk drăm jang sa kơ ŭnh hnam đei atŏk tơ iung. Dang ei ĭnh ‘mĕh vă chă pơma mĭnh ƀar nơ̆r pơkă ăn kon pơlei pơla bơ̆n ‘nĕ pă pơm kiơ̆ ĭnh kơ yuơ ĭnh ‘nŏh jĭ mĭnh ‘nu bơngai jrok kơtrong, pơm tơdrong ưh kơlăp kơƀlep, kiơ̆ Fulrô 12 sơnăm ư̆h kơ đei yă kiơ ba ăn ŭnh hnam, kơna ĭnh hlôi brŏk vih păng đei Đảng, Teh đak tơgum djru. Ƀôh hơdăh đơ̆ng tơdrong ĭnh au kơna rim răih bơngai dăh tơgoăt tơgoăl mĭnh nơ̆r ƀơ̆r đon kiơ̆ Đảng, Teh đak, ưh kơ lui, ưh kơput kiơ̆ nơ̆r khul kơnê̆ chă pơhlŭ pơdôr ... ‘noh dôm tơdrong mă ĭnh ‘mĕh vă chă pơtruh ăn rim răih bơngai”

Ƀok Y Thành, ‘noh kră pơlei đei kơdrưh tơ̆ pơlei K’Dung, xah Hà Ra, apŭng Mang Yang, dêh char Gia Lai.  Hloh 10 sơnăm adrol ki, pơlei K’Dung đei lăng jing anih tơsŭl tơsăl kơyươ khul kiơ̆ lui Tin lành Đê Ga tơdui kon pơlei. Hăm sơnong jang păng tơdrong hlôh vao kơ po, kră pơlei Y Thành hlôi pơgơ̆r hŏk hôp kon pơlei, kơchăng năm truh rim unh hnam đei bơngai kơdâu glăi truh teh đak đe, vă chă pơthoa khan, chă trong hơvơn ‘nhŏng oh chôt vih tơ̆ teh đak. Ƀok hơnơ̆ng tơƀơ̆p kon pơlei vă băt hơdah tơdrong hơpơi ‘meh păng tơroi gah khôi lươ̆t teh đak vă kon pơlei băt hơdah păng pơm kiơ̆: “Adrol ki, ah sơnăm 2009, đei khul kơnê̆ truh pơhlŭ, tơdui kon pơlei tơ̆ xah Ha Ra pơm tơdrong glăi. Inh băt đei tơdrong noh, inh chă hơvơn kon pơlei nĕ mơ̆ng kiơ̆ nơ̆r ‘ngam pơhlŭ đơ̆ng đe sư. Đe sư pơm thoi noh vă kon pơlei hơreh dih băl, phă pơrăm tơdrong tơguăt tơguăl ah sơnăm 2010. Đơ̆ng chă tơblang hơdah noh kon pơlei adoi băt vao păng ưh đei mơ̆ng kiơ̆ đe kơnê̆ bơih. Păng đơ̆ng noh kon pơlei hơdrô̆ băt chă pơm jang mir na ƀa pơtăm, jang kiơ̆ trong tơchơ̆t tơlĕch đơ̆ng Đảng, Khôi lươ̆t Teh đak, tơguăt tơguăl minh bơnôh, sut lê̆ pơngot tơjur hin dơnuh, pơjing tơdrong hơrih jơnap sô̆ sôn, sơđơ̆ng”.