Đei pơgơ̆r đơ̆ng năr 1/6 truh năr 30/6, Khei iung jang kơ yuơ hơ ioh sơnăm au vă jang kiơ̆ tơdrong tơchơ̆t kơ Khôi luơ̆t Hơ ioh găh Khei iung jang kơ yuơ hơ ioh rim sơnăm vă pơtrŭt kơtang tơdrong jang đĭ đăng kon pơlei vang vei lăng năng tông, pơtho pơhrăm păng vei lăng hơ ioh; pơrô̆ tơbăt, hơvơn rim hơnih jang, khul jang, hơnih pơtho pơhrăm, ŭnh hnam, rim bơngai jang kiơ̆ trong jang, trong pơprŏ jang, tơdrong vă jang, tơ iung pơjing hơnih jang păng hơvơn khul iung jang ăn hơ ioh; adoi tơlĕch trong pơprŏ jang, jang kiơ̆ Nơ̆r athei jang kiơ̆ kơsô̆ 28, năr 25/12/2023 kơ Hơnih tơm Chinh trĭ găh atŏk kơtang bơ̆ jang vei lăng năng tông, pơtho pơhrăm păng vei lăng hơ ioh trŏ lăp hăm tơdrong ‘meh vă atŏk tơ iung teh đak pơdrŏng păng hơnŭk hơnoa. Nơ̆r tơlĕch ăn mă Khei iung jang kơ yuơ hơ ioh sơnăm au ‘meh vă pơtruh ăn rim răih kon pơlei ‘noh: Iung jang tơpă, akŏm khul jang ăn hơ ioh; Akŏm khul jang ăn hơ ioh vă trŏ lăp hăm ‘meh vă atŏk tơ iung teh đak pơdrŏng, hơnŭk hơnoa. Sơđơ̆ng hơnăp jang kăl kơ kon jên jang teh đak vă tơlĕch jang kiơ̆ rim trong jang tơgŭm ăn hơ ioh; Vei lăng sơđơ̆ng tơdrong pơm tơm kơdih đe hơ ioh ‘noh jing tơdrong tơm hloh lơ̆m trong jang tơgŭm ăn, trong jang atŏk tơ iung teh đak; Đĭ đăng kon pơlei vei lăng năng tông, pơtho pơhrăm păng vei lăng hơ ioh.