Thôn Gia Xiêng tơring sơlam teh đak Rờ Kơi, apŭng Sa Thầy, dêh char Kon Tum đei vă jê̆ 300 ŭnh hnam hăm 1.000 ‘nu bơngai, đĭ đăng ‘noh bơngao Xdang. ‘Nhŏng A Thể, Bí thư Chi bộ- Thôn trơng thôn Gia Xiêng, tơbăt, lăp đơ̆ng rŏng pơgơ̆r jơnei Chi ƀô̆ lơ̆m khei 11 sơnăm sơ̆, 14 ‘nu đang viên kơ Chi ƀô̆ đei pơjao rim tơdrong jang hơdăh vă jang kiơ̆ tơdrong jang pơrô̆ pơrôp rim ŭnh hnam hơmet pơ ‘lơ̆ng mir pơgar păng tơgŭm djru 8 ŭnh hnam dơnuh uơ oei kơ thôn atŏk tơ iung mŭk drăm ŭnh hnam: “Chi ƀô̆ tơlĕch tơdrong tơchơ̆t đơ̆ng noh hop akom kon pơlei tơlĕch jang kiơ̆ kon pơlei tôch lăp đon. Găh mŭk drăm vei lăng năng tông ‘long pơtăm, kon tơrong. Pơrô̆ hơvơn kon pơlei đei teh pă gan jing ‘lơ̆ng ‘noh chă pơtăm hơmet ming ‘long pơtăm anai, hơmet ming mir pơgar hmă chă pơtăm ‘long theng thôih, sâu riêng păng rim ‘long pơtăm anai. Ŭnh hnam tơnap tap hơrih sa hơdrô̆ drăn ‘noh krao hơvơn kon pơlei vang tơgŭm djru ŭnh hnam ‘noh. Mă kăl hloh ‘noh kon pơlei lăp đon hăm Chi ƀô̆”.

Đảng ƀô̆ tơring sơlam teh đak Rơ Kơi, apŭng Sa Thây đei 13 chi ƀô̆ hăm 176 ‘nu đảng viên, lơ̆m ou đei 6 chi ƀô̆ pơlei kon kông. Lăp đơ̆ng rŏng chi ƀô̆ pơgơ̆r jơnei hop akŏm, lơ̆m 2 năr ‘noh năr 9 păng 10/1/2025 Đang ƀô̆ tơring pơgơ̆r Hop akŏm tih ‘măng mă 18, jăl jang 2025-2030.

Tơdrong tơchơ̆t kơ Hop akŏm Đang ƀô̆ tơring Rơ Kơi xơkơ̆t hơdăh jăl jang ‘nao atŏk kơtang tŏk mŭk drăm jô̆ hơtŏ rim sơnăm iŏk đei hloh 14%; ŭnh hnam dơnuh lơ̆m sơnăm tơjur đơ̆ng 5-6%; truh sơnăm 2030 tơring iŏk đei jang sa jô̆ hơtŏ măt bơngai 68 triu hlak jên ... Ƀok Mai Nhữ Nam, Kơ iĕng Ƀĭ thư Đảng, Kơdră chĕp pơgơ̆r Hơnih vei lăng kon pơlei tơring Rơ Kơi tơbăt, lăp đơ̆ng rŏng pơgơ̆r keh kong Hop akŏm, Khul Kơdră chĕp pơgơ̆r Hơnih Đảng tơring tenh koăng tơlĕch rin trong jang vă jang kiơ̆ ‘lơ̆ng rim tơdrong jang atŏk tơ iung mŭk drăm-tơpôl:“Khul Kơdră chĕp pơgơ̆r Hơnih Đảng tơlĕch jang kiơ̆ tĕnh koăng rim tơdrong tơchơ̆t kơ Hop akŏm hloi, ưh khan lê̆ klui ôh. Pơjao tơdrong jang ăn rim chi ƀô̆ đơ̆ng noh tơlĕch jang hloi trŭh tơ̆ tơring, mă kăl hăm kon pơlei vă kon pơlei băt hlôh ƀôh hơdăh găh tơdrong tơchơ̆t. Jang kiơ̆ Tơdrong tơchơ̆t hơmet ming pơ ‘lơ̆ng mir pơgar hmă, xut xa hnam pơgia, hnam hnăt hnot, tơplih hơgăt teh ‘long pơtăm hrôih vă tơplihi pơtăm ăn dôm ‘long pơtăm đei iŏk yua kơjăp hloh”.

Kiơ̆ trong pơprŏ jang, Đang ƀô̆ apŭng Sa Thây đei Hơnih Đảng dêh char Kon Tum rơih vă pơgơ̆r Hop akŏm tih lơ̆m khei ‘năr blŭng jăl II sơnăm 2025. Kơ yuơ lơ loh truh năr 27/2 ou ki đĭ đăng 11 tơring, thĭ trân kơ apŭng hlôi pơgơ̆r keh đang Hop akom tih Đang ƀô̆ jăl jang 2025-2030. Hop akŏm tih hlôi pôk rơih đei 160 ‘nu kơdră chĕp pơgơ̆r, 55 ‘nu kơdră jang lơ̆m Khul kơdră chĕp pơgơ̆r Đang uỷ, 11 ‘nu Ƀĭ thư Đảng uỷ păng 22 ‘nu Kơ iĕng Ƀĭ thư Đảng uỷ.

Yă Y Sâm, Kơ iĕng Kơdră chĕp pơgơ̆r Đảng apŭng, Kơdră chĕp pơgơ̆r Jơnŭm ve lăng kon pơlei apŭng Sa Thây tơbăt, jang kiơ̆ Nơ̆r pơma pơtôch kơsô̆ 127, năr 28/2/2025 kơ Hơnih tơm Chinh trĭ, Ban Bí thư, Đang ƀô̆ apŭng Sa Thây pơdơ̆h ‘mơ̆i pơgơ̆r Hop akŏm tih, mă lei ưh kơ đei jơhngơ̆m đon gô chang tơdrong hơmet pơ ‘lơ̆ng hơnih jang, khul kơdră chĕp pơgơ̆r chinh trĭ mă lei oei hơnơ̆ng tơlĕch jang kiơ̆ kơtang rim trong tơlĕch jang atŏk tơ iung đĕch:“Nhôn iung jang rim tơdrong đei, kĕ jang kơ tơring. Rim tơdrong vă jang iŏk đei jơnei ‘noh hơnơ̆ng tơlĕch jang kiơ̆.’Ngoăih kơ ‘noh krao hơvơn rim bơngai tơmơ̆t jên jang vă tơmơ̆t jên jang atŏk tơ iung kơ apŭng. Hăm bơ̆ jang tơ iung pơjing Đảng nhôn akŏm bơ̆ jang tơ iung pơjing hơnih jang đảng tơring rơgoh ‘lơ̆ng pran kơtang păng lăng ba kơjăp truh tơdrong pơtho pơjing khul kang ƀô̆ đơ̆ng lơ̆m apŭng truh tơ̆ tơring vă trŏ lăp hăm tơdrong jang hle”.

Jang kiơ̆ Nơ̆r athei jang kiơ̆ kơsô̆ 127, năr 28/2/2025 kơ Hơnih tơm Chinh trĭ, Ban Bí thư, Hơnih Đảng dêh char Kon Tum hlôi pơrô̆ athei pơdơ̆h ‘mơ̆i pơgơ̆r hop akŏm tih Đảng ƀô̆ tơ̆ tơring, tơ̆ apŭng jăl jang 2025-2030. Atŭm hăm pơm kiơ̆ kơjăp nơ̆r pơrô̆ jang đơ̆ng Trung ương, hăm Đảng ƀô̆ rim tơring, thĭ trân tơ̆ dêh char Kon Tum hlôi pơgơ̆r hop akŏm tih tŏk bŏk tơlĕch jang kiơ̆ kơtang rim trong tơlĕch jang taŏk tơ iung mŭk drăm-tơpool. Atŏk kơtang hơnăp jang tơnăp, vang iung jang hrơ̆p mĭnh jơhngơ̆m đon kơ khul kơdră chĕp pơgơ̆r đảng, chĕp pơgơ̆r tơring păng kon pơlei hlôi pơjing đei jơhngơ̆m pran kơtang vă jang kiơ̆ ‘lơ̆ng rim trong tơlĕch jang atŏk tơ iung, tơgop pơm hơtŏk tơdrong hơrih sa kơ kon pơlei sơđơ̆ng păng pơtrut kơtang atŏk tơ iung pơjăp ‘lơ̆ng kơ tơring.