Lêh tơlĕch jang ‘noh jĭ tơdrong jang pơih blŭng ăn dôm tơdrong jang kăl tơroi tơbăt, pơtho, hơtŏk ‘lơ̆ng đon hlôh vao tang găn tơdrong truh glơ̆k kơ đak ăn hơioh, hŏk tro tơ̆ Đắk Lắk sơnăm ‘nâu. Đơ̆ng blŭng sơnăm truh dang ei, lơ̆m dêh char hlôi đei 25 ‘nu hŏk tro đei lôch yua đơ̆ng glơ̆k kơ đak.

Vă tơ jur tŏ sĕt tơdrong ‘nâu, anih pơtho pơhrăm jang hơdai hăm dôm anih jang ƀơm truh tơlĕch jang hrơ̆ch 1 ‘măng, kơtang, đei yua dôm trong jang găh tang găn glơ̆k kơ đak. Anih vei lăng pơtho pơhrăm Đắk Lắk athei dôm anih jang hnam trưng hŏk hơtŏk loi dơ̆ng tơroi tơbăt, tơroi ăn tơdrong hlôh vao, tơdrong gơh tang găn glơ̆k kơ đak truh hŏk tro, mă loi ‘noh jĭ dôm năr pơdơh he. Tŭn pran tơdrong jang pơtho glơi sơđơ̆ng ăn hŏk tro lơ̆m hnam trưng hŏk, hơnơ̆ng pơgơ̆r dôm lăm pơtho glơi ăn kơ hơ ioh.