Tơring jang kơmăy VSIP Hà Tĩnh xă 190,41ha, đei đĭ đăng jên tơmât jang hlŏh 1.555 ti, đei tơlĕch trong vă tơmât jên jang jing tơring jang kơmăy rơgŏh, ‘lơ̆ng rŏ, kơjăp đunh hăm lơ anih jang lăp hăm tơdrong hơgăt ‘lơ̆ng, pơm lăp hăm tơdrong ‘mĕh vă đơ̆ng dôm bơngai tơmât jên jang.

Phó Thủ tướng Trần Hồng Hà pơma hơdăh, VSIP Hà Tĩnh đei hơmĕng pơjing đei jơhngâm pran vă sơng dôm bơngai tơmât jên jang lơ̆m păng ‘ngoăih kơ teh đak găh dôm tơdrong jang nhen điên păng điên tư, kơchơ̆t bán dẫn, pơm kơmăy, unh hơyuh, pin gre điên, pơsei, kơmăy gre ô tô, pơm tơmam xa, anih mong tơmam, hnam kơmăy asong thuê… gô chă tơdrong jang ăn hlŏh 30.000 ‘nu bơngai, pơjing jơhngâm pran vă jang tŏk, tơplih ming trong jang mŭk drăm đơ̆ng dêh char Hà Tĩnh.