Mŏ Nguyễn Thị Hoàng Mai, Kơdră chĕp pơgơ̆r mĭnh công ty cổ phần tơ̆ pơlei tơm Buôn Ma Thuột, dêh char Dak Lăk tơbăt, têt sơnăm ou mŏ pă đei sơ̆l vơ̆l lơ̆m tơdrong vă răt iŏk tơmam drăm ayơ pôk ăn păh jang hơdoi. Dôm tơmam drăm choh jang sa kăl kơ Dak Lăk tôch kơ lơ, ‘lơ̆ng liĕm, trŏ lăp vă  công ty mŏ răt iŏk pôk ăn kơ bôl boăl:“ Nhen rim sơnăm ‘noh ba rơih dôm bai tăh tơmam drăm lăng ‘lơ̆ng kơmăt dôm ƀĕng keo teh đak đe, mă lei sơăm ou ba chă rơih dôm tơmam drăm bek ‘lơ̆ng păng tơmam drăm kơdih tơring bơ̆n nhen găr ‘long găr sơlơ̆k, găr plei theng thôih yuăn, găr plei sa chi, hơlăk đông trùng hạ thảo vă pôk ăn tơmoi jang hơdoi. Mă blŭng ‘noh hăp ‘lơ̆ng, mă ƀar ‘noh tơmam drăm tơbăt hơdăh đơ̆ng tơring kơdih bơ̆n pơm tơlĕch đei”.

Hăm mŏ Lê Thị Thanh Thuý, oei tơ̆ phương Tân Lập, pơlei tơm Buôn Ma Thuột, jei chă rơih dôm ‘nhot plei ‘long hơdrih đei pơtăm tơ̆ Dak Lăk dăh mă rim kơ loăi găr kro:“ Lơ sơnăm ou ĭnh hơnơ̆ng răt rơih dôm tơmam drăm choh jang sa rơgoh, pơm ‘lơ̆ng ăn jơhngơ̆m jăn, trŏ lăp ăn chă sŏng sa lơ̆m năr Têt. Ba lui kơjăp rim hơnih jang, hơp tak xah, hơnih mơdro sa pơm tơlĕch đei tơmam drăm ‘lơ̆ng. păng dang ei tơmam drăm kăl kơ tơring hlôi trŏ lăp hăm tơdrong pơkăp ‘lơ̆ng tĕch mơdro tơ̆ teh đak đe dơ̆ng”.

Kiơ̆ đơ̆ng yă Trần Ngọc Đan Thuỳ, Kơdră chĕp pơgơ̆r công ty Green Foods, pơlei tơm Buôn Ma Thuột, hơnih tĕch mơdro tơmam drăm gĭt kăl tơbăt hơdăh kơ dêh char Dak Lăk tôch kơ lơ, tôch kơ ‘lơ̆ng liĕm, kơjă păh ai. Trong tĕch mơdro ‘lơ̆ng hơ iă, tơchă băt hơnih tơring pơjing hlôi pơm ăn bơngai răt yoa hôn bơnê:“ Rŏ năng gô ưh kơ măh tơmam drăm tơpă mơ̆n. Dôm khei năr têt lơ lou, tơdrong ‘meh vă răt yoa tôch kơ lơ. Đei ‘măng bơ̆n chă apĭnh răt iŏk tơmam drăm đơ̆ng minh ƀar năr ‘noh mă đei, ưh khan đei dai dai hloi ôh. Kơna bơ̆n răt yoa tơmam drăm đơ̆ng tơring pơjing ‘noh ưh kơ đei hli yă kiơ ôh, kơ yuơ pơm tơlĕch dôm yơ tĕch mơdro pơgoh dôm noh hloi kơna tôch kơ ‘lơ̆ng, tôch rơgoh.”

Lơ̆m jơ ‘năr Têt, tơmam drăm choh jang sa ‘lơ̆ng kơ tơring ưh khan lăp đei tơdrong ƀou phu joăt joe mă lei oei tơbăt ăn tơdrong rơgoh ‘lơ̆ng, pơm hơ iă ăn jơhngơ̆m păng hơnŭk hơnoa. Tơdrong bơngai răt yoa Dak Lăk răt rơih dôm tơmam drăm đơ̆ng tơring kơdih pơm tơlĕch vă chă pôk ăn jơ ‘năr Têt adoi nhen iŏk yua lơ̆m unh hnam ‘noh pơm hơdăh ang rang ‘lơ̆ng tơdrong oei sa ‘lơ̆ng rŏ, adoi tơgŭm djru atŏk tơ iung kơjăp ‘lơ̆ng kơ hơnih jang choh jang sa.