‘Nau jing sơnăm đei ƀai chih vang pơlong lơ hloh đơ̆ng sơ̆ truh dang ei hăm đei 116 ƀai chih kơtơ̆ng ang đơ̆ng 78 ‘nu bơngai chih, khul chih, lơ hloh 24 ƀai chih pơtêng hăm sơnăm sơ̆.

Bơngai chih kơtơ̆ng ang Vũ Nam Trang, hơnih bơ̆ jang Radiô Nơ̆r pơma Việt Nam tơ̆ Tây Nguyên iŏk đei tơmam hơpăh C kơ Tơmam hơpăh chih kơtơ̆ng ang dêh char Đak Nông găh chih kơtơ̆ng ang pơre nơ̆r hăm ƀai chih đei hơnăn “Mưh drŏ kăn pơm tơ-‘ngla lơ̆m atŏk tơ iung mŭk drăm”.

Pơtôch, Hơnih vei lăng kon pơlei dêh char Đak Nông hlôi tơchơ̆t drơ̆ng nơ̆r 54 ƀai chih kơtơ̆ng ang iŏk đei Tơmam hơpăh Chih kơtơ̆ng ang dêh char Đak Nông ‘măng mă VII sơnăm 2022, tơ̆ 5 kơ loăi chih kơtơ̆ng ang ‘nŏh rapor, pơdăh tivi, ƀăo in,ƀăo điên tư. Ƀok Võ Ngọc Tú, Kơdră chĕp pơgơ̆r Khul chih kơtơ̆ng ang Đak Nông, Kơdră chĕp pơgơ̆r Ƀăo Đak Nông tơbăt, rim ƀai pơlong chih kơtơ̆ng ang dêh char ‘măng mă VII hlôi đei lơ păng ‘lơ̆ng hơ iă hloh pơtêng hăm sơnăm hơdrol. Mă kăl, lơ ƀai chih hlôi tơƀôh hơdăh tơdrong vang iung jang đơ̆ng khul chih kơtơ̆ng ang hăm tơdrong jang hơmet pơ ‘lơ̆ng, atŏk tơiung mŭk drăm đơ̆ng rŏng jĭ hơbuh Covid-19.