Ƀok Nguyễn An Vinh, sơ̆ pơm Bí thư Đảng dêh char Đắk Lắk, bơngai đĭ đei hloh 50 sơnăm bơ̆jang tơ̆ tơring pơma hơdăh, trong jang tơmơ̆t hơdai 2 dêh char ‘noh jĭ 1 hơyak năm lăp hăm yan âu păng ‘meh vă đơ̆ng kon pơlei:

"Ĭnh ƀôh ‘nâu jĭ tơdrong jang tôch kơ lăp đon kon pơlei đơ̆ng pơđĭ 2 dêh char. Dôm kang ƀô̆ hlôi bơ̆jang lơ̆m khei ‘năr tơblăh vang nhen ĭnh adoi hlôh hơdăh hloh tơdrong pơvei hơdai, tơdrong ‘mêm băl đơ̆ng Đắk Lắk păng Phú Yên. Lơ̆m tơblăh hŭt ayăt Mi, Phú Yên hlôi jing hơnih tơgŭm kơjăp, pơtruh tơmam sa, ƀoh, phe, păng tơmam yua ăn kơ Đắk Lắk. Tơplơ̆ dơ̆ng, Đắk Lắk kŭm jing hơnih gơnang gĭt kăl kơ Phú Yên đơ̆ng păih tơring groi kông. Tơdrong pơvei ‘noh meh jing kon pơlei hlôi chă tơroi băl nơ̆r pơđơ̆k “Đak krong Ba ro jur tơ̆ Đà Rằng/Bu ‘mêm kơ Đắk Lắk hơtŏ hăm Phú Yên.'"

Lơ̆m đon tơchĕng ƀlŏk đơ̆ng dôm bơngai lĭnh hlôi mơ̆t lôch hơrih yua kơ tơdrong rơngei hơdrĕch hơdrŭng, tơdrong pơvei đơ̆ng 2 tơring ưh khan lăp jing tơdrong akŏm đei groi teh, mă oei jing tơdrong ‘mêm bôl buăl. Ƀok Bùi Văn Khiêm, lĭnh so hlôi vang iung tơblăh rơngei Phú Yên sơnăm 1975, dang ei hơrih sa tơ̆ Đắk Lắk, ưh kơ kĕ ôn đei tơdrong hrĭ jơhngơ̆m tơroi:

“Ĭnh đa hơnul hăm ‘nhŏng oh akhan ĭnh hơpơi ‘meh Đắk Lắk mơ̆t hơdai hăm Phú Yên. Tơpă ưh kơ ê tơdrong ‘noh tă jing tơpă. Ĭnh ƀlŏk chăl tơblăh vang sơ̆, đơ̆ng Buôn Ma Thuột ĭnh năm jur tơ̆ Phú Yên, năm trong bri đang kơ ‘noh lĕch tơ̆ đak dơsĭ, păng ĭnh hơpơi ‘meh ning mônh trong gre kơdâu hrĕnh rok tơter đak krong Ba mă jur tơ̆ Đắk Lắk ‘noh tơdrong ‘mêm tôch kơ hơiă. Dang ei bơ̆n tơmơ̆t hơdai 2 dêh char Đắk Lắk hăm Phú Yên ‘noh ưh kơ đei kiơ dang mă hơ pơi ‘meh đơ̆ng ĭnh ƀlep jing tơpă”.  

Mĭnh ‘nu bơngai hlôi lăng ƀôh jơhnơr hơrih nai, ƀok Tô Tấn Tài, oei krao ‘noh Ƀă H’Oanh, sơ̆ pơm Bí thư Thị xăh Buôn Ma Thuột – rơneh tơ̆ Phú Yên, mă lei đĭ ‘măn đĭ jơhnơr kơdih ăn tơdrong jang kach mang tơ̆ Đắk Lắk. Ƀok hlôi pơm lơ kơchư̆k jang gĭt kăl đơ̆ng rŏng năr teh đak rơngei păng jĭ 1 lơ̆m dôm kang ƀô̆ pơm đei ăn tơdrong jang kach mạng tơ̆ tơring Lắk đơ̆ng sơnăm 1959. Vang tơroi jơhngơ̆m đon hơiă găh tơdrong tơchơ̆t tơmơ̆t hơdai 2 dêh char, ƀok tơƀôh jơhngơ̆m đon chơt hơiă mă lei kŭm ưh kơ hiơt tơtă ăn athei lăng kăl tơdrong tơgoăt pôm nơ̆r ƀơ̆r đon lơ̆m tơdoă, tơpôl.

“Bơngơ̆t ‘noh bơngơ̆t pơm thoi yơ lơ̆m tơdoă ‘lơ̆ng, kon pơlei ‘lơ̆ng, pôm nơ̆r ƀơ̆r đon mă tơpă pôm nơ̆r ƀơ̆r đon. Yua kơ bơ̆n oei đei  tơchĕng, hơdrol sơ̆ bơ̆n kŭm đei khei ‘năr tơklăh tơmơ̆t 1,2 dêh char Bình Trị Thiên,đang kơ ‘noh Quảng Nam Đà Nẵng, Phú Yên Khánh Hòa. Mă lei ƀơ̆t doh sơ̆ rŏ lăng tơdrong ‘lơ̆ng tam mă tôm, mă 2 dơ̆ng ‘noh jĭ tơdrong hơmet ăn đon tơchĕng ăn kon pơlei tam mă ‘lơ̆ng kơna đei ƀôh tơdrong dôm dêh char đei tơmơ̆t dơ̆ng tă kơ đei pơjăh băl. Dang ei kui ngeh lơ̆m tơdrong ‘nao hăm tơdrong jang đơ̆ng Đảng chĕp kơ̆l kơjăp, jang ‘lơ̆ng tơdrong jang đon tơchĕng ăn lơ̆m tơdoă đơ̆ng noh păr ang lơ̆m kon pơlei ‘noh ƀôh kŭm ‘lơ̆ng đĕch”.

Yă Niê Thanh Mai, Kơdră Khŭl Joh ayŏ kơdŏ soang dêh char Đắk Lắk, đei ƀă bơngai Phú Yên, mĕ bơngai Đắk Lắk – lăng ƀôh gĭt kăl hloh tơ̆ tơdrong joh ayŏ. Yă Niê Thanh Mai akhan, Phú Yên đei joh ayŏ đak dơsĭ, Đắk Lắk ƀĕnh tơdrong hơiă đơ̆ng dôm hơdrĕch kon kông Tây Nguyên. Tơdăh băt iŏk jang ‘lơ̆ng, ‘nâu gô jing 1 tơdrong joh ayŏ lơ, pơm tơdrong hơiă ăn pơcheh joh ayŏ kơdŏ soang, hơtŏk tơiung tơmang lăng păng pơgơ̆r joh ayŏ.

“Nhôn tôch kơ hơmĕng păng ‘meh vă nhôn gô tơtăh ăn băl păng vang tơgŭm băl dôm tơdrong hlôh vao kŭm nhen đei lơ ƀai hloh 2 tơdrong jang. Tơdăh nhen đei dôm trong tơlĕch jang hơdăh ‘noh dôm tơdrong jang gô tôch kơ lơ tơ̆ hơnăp kơnh”.

Trong lăng đơ̆ng kon pơlei kŭm tơƀôh tơdrong drơ̆ng lăp. Ƀok Nguyễn Song Thoại, kueng kơphô̆ 8, thị trấn Quảng Phú, apŭng Cư M’gar, dêh char Đắk Lắk akhan:

“Dang ei Đắk Lắk hăm Phú Yên ‘noh trŏ lăp, đei kông, đei đak dơsĭ. Mă lei sư hơnat ‘noh jĭ tơdrong joh ayŏ oei mŭk drăm ‘noh hơnih hơyơ kŭm jang đei ngăl, hmă đĕch”.

Tơdrong tơmơ̆t hơdai đơ̆ng Đắk Lắk păng Phú Yên ưh khan lăp jing tơdrong tơchơ̆t bơ̆jang, mă oei jing tơdrong vih hơlơ̆k đơ̆ng 1 tơdrong pơgơ̆p hlôi đei tơklep hơdai lơ̆m khei ‘năr tơblăh vang sơ̆. Hăm groi teh tơgŭm băl, joh ayŏ lơ păng jơhnơr hơrih tơklep hơdai, dêh char Đắk Lắk mă đei hơmĕng gô jing tơdrong jang tŏk ‘nao tơ̆ tơring Pơbăh tŏk bŏk păng Tây Nguyên. Hơdai hăm ‘noh, nhen dôm nơ̆r rơgop hlôi tơroi, tơdrong tơm ‘noh jĭ tơdrong drơ̆ng lăp lơ̆m tơdoă kơdră chĕp kơ̆l păng tơdrong lăp đon đơ̆ng kon pơlei. Lăp mưh thoi noh, tơdrong tơmơ̆t hơdai mă tơpă hơtŏk tơiung đei jơhngơ̆m pran akŏm, pơm đei 1 tơdrong hơtŏk tơiung ‘nao, lăp ‘lơ̆ng păng kơjăp.