‘Nâu jing tơdrong kăp gĭt tơgop hơtŏk hloh dơ̆ng tơdrong jang tơbôl, tơguăt tơguăl kăp gĭt, jang hadoi tôm tơdrong kơ 2 Đảng, 2 Jơnŭm pơgơ̆r kơpal păng kon pơlei 2 teh đak Việt Nam - Lào. Tơ̆ ‘măng tơƀơ̆p, 2 Kơdră ră hơdah tơdrong juăt jue tơguăt, tơgŭm dih băl; sơkơ̆t hơdah tơdrong jang tơbôl Việt Nam - Lào jing mŭk drăm kăp gĭt kơ 2 hơdrung hơdrĕch, jing tơdrong kăl lơ̆m jơhnơr hơrih păng jing jơhngơ̆m pran tih tên hloh kơ 2 Đảng, 2 teh đak kăl đei hơtŏk, pơdjoi ăn kon mon kon sau. Ƀok Tổng Ƀĭ thư Nguyễn Phú Trọng sơkơ̆t hơdah, tơbôl Việt Nam - Lào hơnơ̆ng jing sơnong kăp gĭt, jing tơdrong jang hơlâu lơ̆m tơchơ̆t jang tơbôl đơ̆ng Việt Nam; atŭm hăm noh ră hơdah minh ƀar tơdrong tơm vă hơtŏk jang tơbôl kơ 2 đảng, 2 teh đak lơ̆m khei năr truh.

Tơ̆ ‘măng tơƀơ̆p, Thủ tướng teh đak bơ̆n Phạm Minh Chính păng Thủ tướng teh đak Lào Xỏn-xay Xỉ-phăn-đon drơ̆ng nơ̆r 2 đảng, 2 teh đak kăl pơtoi hơtŏk tơguăt tơguăl, hơtŏk pran tơdrong tơm jang hadoi gah vei sơđơ̆ng tơpôl păng jang tơbôl; pơm trong jang dơnơm lơ̆m jang hadoi mŭk drăm; pơtoi tơplih ‘nao, hơtŏk jang hadoi lơ̆m dôm tơdrong jang, vă hơtŏk hloh dơ̆ng tơguăt tơguăl kăp gĭt Việt Nam - Lào, kơyuơ tơdrong pơyua kăp gĭt kơ kon pơlei rim teh đak, kơyuơ todrong rơngei, jang hadoi păng hơtŏk tơ-iung lơ̆m tơring păng lơ̆m kơpal teh.