Đảng, Teh đak Trung Quốc hlôi pơgơ̆r tôch gĭt kăl sơng hơvơn Tổng Bí thư, Kơdră chĕp pơgơ̆r teh đak Tô Lâm atŭm hăm hơkăn păng Khul kơdră kơpal teh đak bơ̆n. ‘Măng năm tơmang đơ̆ng Tổng Bí thư, Kơdră teh đak Tô Lâm jĭ ‘măng năm tơmang git kăl hăm tơdrong tơgoăt tơgoăl Việt-Trung lơ̆m khei năr truh ou kơnh adoi nhen tơdrong jang tơbôl, atok tơ iung kơ Teh đak bơ̆n lơ̆m khei năr kơnh, lơ̆m khei năr tơgoăt tơgoăl 2 teh đak Việt Nam – Trung Quốc hơnơ̆ng vei kơjăp hơ yak atŏk tơ iung ‘lơ̆ng, lang să kơtang jơ̆p truh rim khul jang, hơnih jang pơjing đei jơ ‘năr tơgoăt tơgoăl ‘lơ̆ng liĕm, jơnei. Hăm tơdrong lăng gĭt păng iung jang hơdoi kơjăp kơ ƀar păh, ‘măng năm tơmang teh đak Trung Quốc ‘măng mă ou đơ̆ng Tổng Bí thư, Kơdră chĕp pơgơ̆r teh đak Tô Lâm păng hơkăn ƀok đei hơmŏ gô pơih đei mĭnh jăl trong atŏk tơ iung ‘nao ăn tơgoăt tơgoăl teh đak tơjê̆ ‘lơ̆ng liĕm, jang hơdoi tôm tong, Tơpôl tơbăt dih băl hơnô̆ hơnăp kơnh Việt Nam - Trung Quốc ‘lơ̆ng hơ iă păng kơtang hloh dơ̆ng.