Đơ̆ng blŭng jăl jang, Kuô̆k hô̆i hlôi pơdrơ̆ng 43 khôi luơ̆t, hloh 60 tơdrong tơchơ̆t; Hơnih bơ̆ jang chĕp pơgơ̆r Kuô̆k hô̆i hlôi pơjing đei 45 tơdrong tơchơ̆t păng 3 tơdrong pơkăp. Tổng Bí thư, Kơdră chĕp pơgơ̆r teh đak Tô Lâm jei athei Kuôk hô̆i kăl hlôi chă tơchĕng hơlen sơkơ̆t hơdăh trong bơ̆ jang dăr lăng tơm kơ Kuôk hô̆i trŏ lăp hăm yan ou, veh ver lei lăi hăm tơdrong jang kơ rim hơnih bơ̆ jang Teh đak anai pơm ăn hiong lơ jơ ‘năr. Hơnơ̆ng pơm hơtŏk bơ̆ jang ‘lơ̆ng lơm tơdrong pơgơ̆r apĭnh, tơblang hơdăh, dăr lăng hơlen hla bơar khôi luơ̆t; lăng kơjăp lăng hơlen, pơrô̆ pơrôp tơdrong tơdrong jang kiơ̆ rim nơ̆r athei jang đơ̆ng rŏng dăr lăng. Tơplih ‘nao trong tơchơ̆t găh kon jên jang Teh đak mă trŏ lăp, yak hơdoi hăm dăr lăng lơ̆m tơdrong jang kiơ̆ kon jên jang teh đak, hơnơ̆ng tơplih trong pơjing rim tơdrong tơchơ̆t hăm khôi luơ̆t jang jên hu, hơnih mong jên bơ̆ jang teh đak. Tơ̆ ‘măng hop akŏm ou, dôm tơdrong bơ̆ jang dăr lăng păng tơchơ̆t rim tơdrong kăl kơ teh đak tôch kơ lơ, bơngai tăh hla tŏk bŏk gô chang; athei rim bơngai tang măt Kuôk hô̆i bơ̆ jang ‘lơ̆ng hơnăp jang, tơdrong jang kơ dih lơ̆m pơma dơnuh păng tơchơ̆t dôm tơdrong kăl ou.