Sơng pơma dơnuh hăm Kơdră tang măt Argentina, Tổng Bí thư, Kơdră chep pơgơ̆r Teh đak Tô Lâm ‘meh vă Kơdră tang măt gô hơdrin pơtrŭt kơtang tơgoăt tơgoăl ƀar teh đak, vei kơjăp ăn Kơdră kơpal năm ngôi dih băl păng iung jang rim trong jang hơdoi, pơm pơkeh tơdrong pơkăp ăn tơgoăt tơgoăl jang hơdoi. Hmach chơt hơ iă ăn Kơdră tang măt teh đak Algeria, Tổng Bí thư, Kơdră chĕp pơgơ̆r teh đak sơkơ̆t hơdăh Việt Nam lăng kơjăp tơgoăt tơgoăl hăm Angieri, ‘meh vă Kơdră tang măt hơdrin pơm pơtrŭt kơtang ăn khul kơdră kơpal tơƀơ̆p dih băl, pơtrŭt kơtang jang hơdoi mơdro sa tơmam drăm, iung jang kiơ̆ ‘lơ̆ng rim tơdrong pơkăp jang hơdoi. Sơng pơma dơnuh hăm Kơdră tang măt Đức, Tổng Bí thư, Kơdră chĕp pơgơ̆r Teh đak Tô Lâm ‘meh vă Kơdră tang măt tơgop ‘lơ̆ng hơ iă lơ̆m tơlĕch jang kiơ̆ tơgoăt tơgoăl Jang hơdoi tôm tong Việt Nam - Đức. Tổng Bí thư, Kơdră chĕp pơgơ̆r teh đak sơkơ̆t hơdăh, rim hơnih tơm, hơnih jang, tơring tơrang Việt Nam gô pơjing rơvơn vă Kơdră tang măt đei mĭnh tơdrong jang keh kong.