Tổng Bí thư, Kơdră chĕp pơgơ̆r teh đak Tô Lâm vang năm păng iung pơma tơ̆ pơm lêh mơ̆t hŏk blŭng. Lăm hŏk ou đei 49 ‘nu bơngai hŏk, khei ‘năr hŏk đơ̆ng năr 14/10/2024 truh 25/11/2024. Tơdrong hŏk pơhrăm ou đei 33 tơdrong tơm ‘nou jĭ dôm tơdrong gĭt kăl hloh găh jơhngơ̆m đon trong bơ̆ jang kơ Đảng; tơ iung pơjing Đảng, Teh đak păng khul jang chinh trĭ; atok tơ iung mŭk drăm, jŏh ayŏ, tơpôl, vei lăng sơđơ̆ng teh đak, sơđơ̆ng tơring păng jang tơbôl; khoa hŏk chĕp pơgơ̆r, vei lăng lơ̆m khei năr hle. Tổng Bí thư, Kơdră chĕp pơgơ̆r Teh đak Tô Lâm athei, dôm bơngai vang iung jang pơtho ăn, pơjing đei dôm Tơdrong pơtho pơhrăm mă trŏ lăp, mă ‘lơ̆ng hơ iă, tơƀôh tơbăt hơdăh trong jang trŏ lăp hơnhăk đei jơnei ‘lơ̆ng, kăl lăng kơjăp trong tơchăr hơ iă đơ̆ng bơngai hŏk pơhrăm, lăng kơjăp truh tơdrong chă pơma dơnuh dih băl ƀar păh bơngai pơtho hăm bơngai hŏk, jang kiơ̆ ‘lơ̆ng trong jang "hŏk rok kiơ̆ hăm jang hloi”, nơ̆r pơma tơƀôh hơdăh hăm yan ou, hơnơ̆ng iung jang chă hơlen, dăr lăng lơ̆m hŏk pơhrăm, pơhrăm jơhngơ̆m đon oei sa ‘lơ̆ng, trong jang kơ bơngai hŏk hnam trương Đảng; pơjing rơvơn vă rim bơngai hŏk đei hŏk pơhrăm keh đang.