Hơkŭh kơ̆l tơ̆ hơnăp pơ hngol đe linh lôch tang teh đak, Tổng Bí thư, Kơdră teh đak bơ̆n ƀok Tô Lâm păng khul jang tơƀôh jơhngâm đon ‘mêm bơnê tôch pơneh, ‘mêm kơeng tôch ai hăm kŏng tih tên đơ̆ng đe linh lôch tang ăn teh đak, hlôi plang đĭ sơnăm păh iung, vang tơblăh tôch kơtang, chu lôch hŭt hơkâu yoa tơdrong rơngei, hiôk hian kơ teh đak.

Kŭp kơ̆l sŏh plang nhang ƀlŏk hơdơ̆r kơ Tổng Bí thư Lê Duẩn tơ̆ Anih ƀlŏk hơdơ̆r kơ ƀok tơ̆ plei Hậu Kiên, xăh Triệu Thành, apŭng Triệu Phong, Tổng Bí thư, Kơdră teh đak bơ̆n, ƀok Tô Lâm păng khul jang tơƀôh jơhngâm đon kŭp yom, ‘mêm bơnê tôch ai tơ̆ hơnăp dôm tơdrong plang jơhngâm tih tên đơ̆ng Tổng Bí thư Lê Duẩn hăm tơdrong tơblăh iŏk rơngei hơdrĕch hơdrung, pơjing đei 1 teh đak kơjăp ‘lơ̆ng.

Chih lơ̆m hla ar ƀlŏk hơdơ̆r, Tổng Bí thư, Kơdră teh đak bơ̆n chih hơdăh: “Đĭ Chăl arih păng bơ̆ jang đơ̆ng ƀok Lê Duẩn hlôi tơgop ăn tơdrong tơblăh iŏk rơngei kơ hơdrĕch hơdrung păng tơiung pơjing chủ nghĩa xã hội, jang tŏk teh đak Việt Nam. Dôm kŏng tih tên, plang pơyơ̆r tôch ai đơ̆ng ƀok Lê Duẩn hlôi pơ ư pơ ang teh đak Việt Nam jơ̆p jang păng đei kơjăp ling lang lơ̆m jơhnơr arih ‘lơ̆ng hơiă păng kơtang nuih mơng đơ̆ng hơdrĕch hơdrung”.