Tơ̆ hop akŏm, Tổng Bí thư, Kơdră teh đak Tô Lâm tơchĕng ‘lơ̆ng păng pôk pơ ư dôm tơdrong adrin đơ̆ng grŭp chih hơmet hla ar kăl hlôi bơ̆ jang tôch kơchăng, tơnăp vă ră roi ăn Khul kơdră chĕp kơ̆l Grŭp Hla ar chih tơroi Chinh trĭ ‘măng mă 5; Atŭm hăm ‘nŏh tơtă ăn Grŭp chih athei tơchĕng hơlen mă brĕ dôm tơdrong tơchơ̆t đơ̆ng Khul kơdră chĕp kơ̆l Trung ương Đảng, Anih tơm Chinh trĭ, Ban Bí thư, dôm tơdrong tơchơ̆t đơ̆ng Quốc hội păng Khul kơdră teh đak... mă loi jĭ dôm hla ar chih ‘nao đei tơlĕch lơ̆m jăl jang âu ki.

Tổng Bí thư, Kơdră teh đak Tô Lâm pơma hơdăh, hla ar chih Chinh trĭ kơ Hop akŏm mă XIV athei jing tơmam đơ̆ng đon gơh hơgei, jĭ 1 tơdrong jang rơgei hlŏh kơ khul grŭp đơ̆ng đĭ đăng Đảng, đĭ đăng kon pơlei, đĭ đăng khul linh, nhen nhap ƀok Tổng Bí thư Nguyễn Phú Trọng hlôi pơtho, athei tưk tơiung tơdrong kon pơlei pơm tơm păng đon rơgei đơ̆ng khul tơpôl, athei đei tơdrong vang tơgop đơ̆ng dôm anih jang, khul grŭp tơ̆ Trung ương păng dôm tơring, dôm khul jang chinh trĭ – tơpôl păng Kon pơlei.