Pơgê brei (15/8) tơ̆ Anih jang kơ Trung ương Đảng, tơbăt 79 sơnăm năr Kăch mang khei 8 păng Quốc khánh teh đak Cộng hòa xã hội chủ nghĩa Việt Nam 2/9, Anih tơm Chinh trĭ pơgơ̆r Hop akŏm, tơƀâp dôm kơdră chĕp kơ̆l dang ei păng adrol ki kơ Đảng, Teh đak vă roi tơbăt rim tơdrong găh Đảng, teh đak lơ̆m dôm khei blŭng sơnăm 2024, tơdrong jang tơm lơ̆m dôm khei hơtuch sơnăm 2024 păng tơ̆ hơnăp kơnh.

Pơma tơ̆ hop akŏm, tang măt ăn dôm kơdră chĕp kơ̆l Đảng, Teh đak, Tổng Bí thư, Kơdră teh đak Tô Lâm bơnê kơ đe ƀok Kơdră chĕp kơ̆l dang ei păng adrol ki kơ Đảng, Teh đak, Mặt trận Tổ quốc Việt Nam vang truh akŏm, hăm ƀĕnh jơhngâm đon ‘lơ̆ng hơiă; pơtruh nơ̆r thơ thou ăn đe kơdră chĕp kơ̆l adrol ki kŭm hăm hnam tơnŏ pran jăng, hiôk chơt păng rim tơdrong ‘lơ̆ng ngăl. Tổng Bí thư, Kơdră teh đak Tô Lâm pơma hơdăh, Anih tơm Chinh trĭ, Ban Bí thư oei adrin akŏm jơhngâm chĕp kơ̆l pơgơ̆r, pơm ‘lơ̆ng ăn tơdrong jang tŏk, jăh jang kĕh rim tơdrong hơgăt, tơdrong vă jang mă Tơdrong tơchơ̆t đơ̆ng Hop akŏm 13 kơ Đảng hlôi tơlĕch; tơgŭm hơmet hơdrol dôm tơdrong pơmat tat, tơhlăk tăk găh trong pơgơ̆r jang, pơjing tơdrong ‘lơ̆ng hloh ăn rim tơdrong jang kiơ̆ khôi luơ̆t, vang tơgop tơiung pơjing Teh đak, pơm hơtŏk tơdrong arih xa ăn kon pơlei đơ̆ng rim khul grŭp, rim bơngai tĕch mơdro lơ̆m teh đak păng tơ̆ teh đak đe.