Pơma tơ̆ jơ tơƀơ̆p muh măt, Tổng Bí thư, Kơdră teh đak Tô Lâm chih iŏk păng pôk pơ ư dôm jơnei, iŏk yua gĭt kăl đơ̆ng khŭl mơdro sa hăm tơdrong hơtŏk tơiung teh đak. hơdai hăm chih iŏk păng pôk pơ ư Khŭl jang Tĕch mơdro păng Kơmăy kơmŏk Việt Nam kŭm hăm dôm khŭl mơdro sa, anih mơdro sa hlôi đei lơ tơgop pơjing tơpôl mơdro sa pran kơjăp.

Mă lei, Tổng Bí thư, Kơdră teh đak kŭm tơƀôh ăn dôm tơdrong tam mă gan ‘lơ̆ng đơ̆ng khŭl mơdro sa teh đak bơ̆n oei iĕ, tơdrong jên hu ưh kơ lơ, tơdrong vei lăng tam mă gan ‘lơ̆ng, tam mă đei lơ bơngai mơdro sa tŏk pơjei lơ̆m tơring păng jơ̆p plĕnh teh. Kiơ̆ Tổng Bí thư, Kơdră teh đak, anih mơdro sa hơnŭk hơnoa ‘noh teh đak gô hơnŭk hơnoa. Yua thoi noh, tơdrong akŏm hơmet pơ ‘lơ̆ng mơmat tat ăn anih mơdro sa, pơtrŭt anih mơdro sa hơtŏk tơiung ‘noh jĭ hơnăp jang tơm gĭt kăl tih hloh đơ̆ng đĭ đăng rim tơring, rim anih jang. Tổng Bí thư, Kơdră teh đak hmach thơ thâu kơ khŭl mơdro sa teh đak bơ̆n roi ‘năr roi hơtŏk tơiung pran kơtang păng kơjăp, yak hloh long nol, sơng iŏk tơdrong hiôk, iŏk đei lơ jơnei tĕch mơdro, tơgop lơ̆m tơdrong hơtŏk tơiung mŭk drăm teh đak păng tơdrong hơnŭk hơnoa kơ tơpôl.