“Teh đak bơ̆n tam đei lai yơ pran ‘lơ̆ng, đei anih dơ̆ng păng bưng ai tih lơ̆m apŭng plenh teh nhen hrei ‘nâu, đei dơ̆ng lơ tơdrong ‘lơ̆ng, pơih trong hiôk hian vă yak tŏk pran kơjăp kiơ̆ trong mă Đảng bơ̆n, kon pơlei bơ̆n păng Ƀok Hô ‘mêm kơeng hlôi rơih.”

‘Nâu jĭ nơ̆r pơma đơ̆ng Tổng Bí thư Nguyễn Phú Trọng tơ̆ hop akŏm mă mônh Khul kơdră chĕp kơ̆l Trung ương Đảng jăl XIII păng tơ̆ lơ hop akŏm gĭt kăl mưh Tổng Bí thư truh akŏm păng đei iung pơma nơ̆r pơtho tơƀôh. Ưh kơsĭ chă pơma hơchăng ngôi đech mă Tổng Bí thư pơma truh tơdrong ‘nâu yoa tơ̆ yăn âu ăn ƀôh, vă jê̆ 40 sơnăm bơ̆ jang tơplih ‘nao, đơ̆ng 1 teh đak tơnuh hin, đei anih jang, tơmam drăm – ki thuơ̆t, tơdrong jang mŭk drăm tơpôl ưh ‘lơ̆ng, đon hlôh vao ưh lơ, truh dang ei, Việt Nam đĭ tŏk jing teh đak oei vă tŏk pơdrŏng, đei iŏk yoa păh lăp; tơdrong joh ayŏ kơ dŏ xoang oei tŏk pran hơnơ̆ng, tơdrong arih xa găh tơmam drăm păng jơhngâm đon kơ kon pơlei roi tŏk, roi hiôk jơnap; tơdrong jang tơiung pơjing Đảng păng anih jang chinh trĭ tŏk pran; tơdrong tơguăt đĭ đăng hơdrĕch hơdrung hơnơ̆ng đei vei kơjăp; tơdrong jang chinh trĭ, tơpôl sơđơ̆ng ‘lơ̆ng, tơdrong jang khul linh, vei lăng teh đak rơngei hiôk hian, pơm tơm kơdih tôch kơjăp; anih dơ̆ng păng bưng ai kơ teh đak roi đunh roi tŏk lơ̆m apŭng plenh teh.

Hơdrô̆ găh tơdrong jang tơbôl, truh akŏm păng iung pơma nơ̆r pơtho tơ̆ Hop akŏm jang tơbôl lơ̆m teh đak Tổng Bí thư Nguyễn Phú Trọng pơma hơdăh găh tơdrong pơjing, atŏk tơiung đơ̆ng Trong jang tơbôl “‘Long kram Việt Nam: Tơm kơjăp, dơng rơmuăn, ƀĕng jơhngâm đon ‘lơ̆ng păng bưng ai, grih tih đơ̆ng hơdrĕch Việt Nam”, roi đunh roi đei apŭng plenh teh năng kăl:

”Ưh jor anih jang tơbôl athei hơnơ̆ng tơƀôh hơdăh đon rơgei, nuih mơng, hơđơ̆ng jơhngâm păng bưng ai tih đơ̆ng Anih jang tơbôl Chăl Ƀok Hô păng hơnơ̆ng chĕp vei tơdrong jang tơbôl kơtang nuih mơng mă lei đei ƀĕnh jơhngâm đon ‘lơ̆ng đơ̆ng hơdrĕch Việt Nam, hơnơ̆ng tơplih ‘nao, tơiung pơjing păng jang tŏk pơjing đei anih jang tơbôl Việt Nam chăl hle pran kơjăp rim tơdrong, đei ƀĕnh tơdrong juuăt ‘lơ̆ng thoi um ai ‘long kram Việt Nam.”

Mĭnh lơ̆m dôm tơdrong ‘lơ̆ng hơiă oei đei hơnơ̆ng lơ̆m tơdrong jang tang găn xa pơjĭp, pơm glăi đơ̆ng blŭng jăl 11 truh dang ei ‘nŏh jĭ tơdrong tơiung pơjing, hơmet ming Đảng hơnơ̆ng đei tưk pran hơdai hăm lơ nơ̆r pơma tôch hơiă đơ̆ng Tổng Bí thư Nguyễn Phú Trọng, Kơdră chĕp kơ̆l Anih pơgơ̆r jang kơ Trung ương găh tang găn xa pơjĭp, pơm glăi. Tổng Bí thư pơma hơdăh, hăm tơdrong pơjing Anih pơgơ̆r jang kơ Trung ương (găh Anih tơm Chinh trĭ) truh dang ei, tơdrong jang tang găn xa pơjĭp, pơm glăi "đĭ jing tơdrong jang hơnơ̆ng, ưh gơ̆h pơm hơdrơ̆k dơ̆ng". Yoa thoi noh, “Đon pơyom băl, veh ver, ưh ‘meh bou ƀơm, "iŏk xa jên đe, pă pơ̆n ha ƀơ̆r pơma" dăh mă đei đon tơchĕng ưh ‘lơ̆ng, chă iŏk tơdrong tơbral vă jăm joă, hil kơ bơngai nai, pơm tơsŭl dơdoă, tơtă tơdrong ưh kơ trŏ ngăl”.

Kiơ̆ Tổng Bí thư, pơjing, hơmet ming Đảng ‘nŏh jĭ tơdrong pơjing ming khul grŭp, pơjing ming kon bơngai, jĭ tơdrong jang găh kon bơngai, ƀônh ƀơm truh bưng ai, ƀơm truh tơdrong đei yoa, ƀơm truh tơdrong pơvei kơ kon bơngai. Yoa thoi  noh, athei bơ̆n tơbrăl kơdih, tơblang hơdăh, hơlen năng rim tơdrong ‘lơ̆ng, tơdrong tam mă ‘lơ̆ng đơ̆ng kơdih; athei hơlen năng truh bơngai nai hai. Tơdăh ưh đei đon tơbral kơdih, pơm ưh ‘lơ ‘lŏ, ưh tơpăt ‘nŏh jing ƀônh đei đon ưh kơchăng, đa lăng ƀôh tơdrong pran ‘lơ̆ng đơ̆ng kơdih lơ ƀiơ kơ bơngai nai; tơplơ̆ kơ ‘nŏh hơnơ̆ng ƀôh tơdrong ưh ‘lơ̆ng, ưh lăp đơ̆ng bơngai nai lơ hlŏh kơdih kâu:

“Lơ ‘măng inh pơma bơih, dang ei apinh pơma dơ̆ng, bu đei đon tơchĕng thoi âu athei hŭt lê̆, veh 1 păh, lê̆ bơngai nai jang dơ̆ng, tơdrong arih kon bơngai lăp 1 vât đĕch, athei  arih thoi yơ vă huei hmach, huei ơh yoa dôm tơdrong kơnê̆, ưh kơ tơpăt ‘lơ̆ng, jên lơ vă pơm kiơ, lôch kơnh ưh gơ̆h chĕp ba ôh lah. Bưng ai ‘nŏh jĭ tơdrong kăp gĭt hlŏh.”

Lơ̆m tơdrong joh ayŏ kơ dŏ xoang, ƀât oei arih ki, Tổng Bí thư Nguyễn Phú Trọng kŭm pơma tôch hơdăh hơnăp jang tôch gĭt kăl đơ̆ng tơdrong juăt ‘lơ̆ng, đơ̆ng jŏh ayŏ kơ dŏ xoang, ‘nŏh jĭ tơm a kơ jơhngâm đon, jĭ jơhngâm pran vă jang tŏk đơ̆ng tơpôl. Gơnơm đơ̆ng 1 tơdrong joh ayŏ kơ dŏ xoang ƀĕnh um ai ‘lơ̆ng hơiă kơ hơdrĕch hơdrung pơm anih gơn, mă hơdrĕch bơ̆n hlôi yak hlŏh rim tơdrong nol tôch pơmat tat, hơnơ̆ng yak tŏk kiơ̆ chăl arih. Kơlih thoi noh, Tổng Bí thư Nguyễn Phú Trọng đei nơ̆r athei, rim anih jang chinh trĭ, đĭ đăng Đảng, đi đăng kon pơlei, đĭ đăng khul linh athei hlôh vao mă trŏ tơdrong gĭt kăl đơ̆ng joh ayŏ kơ dŏ xoang ‘lơ̆ng hơiă lơ̆m tơdrong chĕp kơ̆l pơgơ̆r kăch mang, Đảng Cộng sản Việt Nam păng Ƀok Hô hơnơ̆ng năng kăl tơdrong jŏh ayŏ kơ dŏ xoang ‘lơ̆ng, ‘nŏh jĭ 1 tơdrong jang kăch mang, jĭ tơhnit “tơ̆k hơdăh trong ăn kon pơlei yak”.

Tơ̆ Hop akŏm Joh ayŏ kơ dŏ xoang lơ̆m teh đak pơgơ̆r ‘năr 24/11/2021, Tổng Bí thư  Nguyễn Phú Trọng kŭm đei 1 nơ̆r pơma tôch hơiă thoi âu: “Đe pơma muh măt kon bơngai đei hơbŏ ‘lơ̆ng, mĭnh unh hnam arih xa ‘lơ̆ng rơgei, 1 hơdrĕch hơdrung đei tơdrong juăt joh ayŏ kơ dŏ xoang ‘lơ̆ng hơiă, đang kơ ‘nŏh jĭ tơdrong arih xa ‘lơ̆ng, tơdrong pơma xa gơ̆h… oei dôm tơdrong kiơ kơnê̆, jơhngâm đon kơnê̆ ‘mê̆ ‘mach, dôm tơdrong jang glăi luơ̆t ‘nŏh đe khan, kơnê̆ kơnut, ưh kơ ‘lơ̆ng kiơ, tơjră plơ̆ hăm tơdrong juăt ‘lơ̆ng, hiôk chơt kơ kon bơngai, tơdrong ‘nŏh vă akhan ưh lăp kăl đei jên lơ, muk mam rơkăh rơkai, hơbăn ‘nao, ao plơ̆ng mă oei pơma truh tơdrong ‘lơ̆ng hơiă đơ̆ng jơhngâm đon, arih hăm ƀĕnh jơhhngâm đon ‘mêm kơ eng, đon băt ‘mêm mơnat, băt tơdrong trŏ păng hơtŏ băl”.

Oei arih ki, mưh rim ‘măng ‘mĕh pơma tơlĕch nơ̆r đơ̆ng jơhngâm đon kơdih, Tổng Bí thư Nguyễn Phú Trọng hơnơ̆ng pơma dơ̆ng 1 nơ̆r lơ̆m ƀai chih đei ư hơnhang ang hơnhăk “Pơsei đei ƀuh pơm thoi noh" đơ̆ng bơngai chih văn Liên Xô Nikolai Ostrovsky:

“Tơdrong kăp gĭt hlŏh kơ kon bơngai ‘nŏh jĭ tơdrong arih păng bưng ai mưh arih, kơlih yoa chăl arih kơ kon bơngai lăp 1 vât đĕch. Athei arih thoi yơ vă huei hmach, huei ơh yoa dôm khei ‘năr arih kư̆ kă, pră hơchăng pă lăng tơdrong kiơ; vă huei hrơ mơlou yoa dôm tơdrong jang kơlĕl kơƀlep, kơnê̆ ‘mê̆ ‘mach, đei rim bơngai jăm joă; vă truh ƀât lôch hơchăng kơnh, bơ̆n oei ƀôh čhôk ‘nă akhan: Đĭ chăl arih bơ̆n, đĭ đăng jơhngâm pran bơ̆n, bơ̆n hlôi plang pơyơ̆r đĭ ăn tơdrong jang ‘lơ̆ng hơiă hlŏh lơ̆m chăl arih – Tơdrong tơblăh iŏk rơngei ăn hơdrĕch hơdrung, iŏk rơngei ăn kon bơngai, hơnhăk ba tơdrong hiôk chơt ăn kon pơlei!”.