Đơ̆ng rŏng Hop akŏm ‘măng mă 13 kơ Đảng, tơdrong apŭng plĕnh teh hlôi đei ƀôh tơplih tơtĕnh, krê hơmơt, ưh kơ ê, pơm ăn tơdrong jang tơbôl đơ̆ng Việt Nam dơ̆ng tơ̆ hơnăp lơ mơmat tat, long nol. Mă lei, sơnăm 2023, 2024 hlôi dơ̆ng lăng lơ tơdrong jang tơbôl tôch kơ hơiă, hơnơ̆ng păng jing tơdrong hơdăh ‘lơ̆ng kơ teh đak. Tơdrong bơ̆n sơng Tổng Bí thư, Kơdră teh đak Trung Quốc Tập Cận Bình, Kơdră tơm teh đak Mi Joe Biden, Tổng Bí thư, Kơdră teh đak Lào Thoong-lun Xỉ-xu-lít, Kơdră Đảng Kon pơlei Cam-pu-chia Hun Sen, Hun Manet, ‘nao âu ‘noh jĭ Kơdră tơm teh đak Nga Putin păng kơdră chĕp kơ̆l teh đak gĭt kăl nai truh năm ngôi tơ̆ Việt Nam; tơdrong Việt Nam vang jang păng roi ‘năr roi đei hơnăp jang gĭt kăl lơ̆m dôm trong jang lơ pang nhen ASEAN, Liên hợp quốc, tơring Mê Công, APEC, AIPA, COP 28… đei lăng ‘noh jĭ dôm tơdrong jang kăl ‘lơ̆ng jơhnơr arih , tơgop sơkơ̆t hơdăh “tam mă đei lai yơ teh đak bơ̆n đei đăi tơdrong jang tih, tơdrong pran, bưng ai păng anih dơ̆ng lơ̆m apŭng plĕnh teh nhen hrei ‘nâu”. Đei đăi jơnei âu, ‘noh jĭ gơnang đơ̆ng 1 tơdrong trĕng lăng păng 1 đon tơchĕng jang tơbôl pha ra đơ̆ng bơngai chĕp kơ̆l teh đak. ‘Noh jĭ Tổng Bí thư Nguyễn Phú Trọng. Ƀok Lê Hoài Trung, Bí thư Trung ương Đảng, Kơdră Anih jang tơbôl Trung ương hơlen lăng: “Gơh ƀôh ƀok Nguyễn Phú Trọng tôch kơ lăng kăl tơdrong jang tơbôl, lơ̆m dôm ƀai pơma ling lang pơma hơdăh mă hăm 1 hơdrĕch hơdrŭng hơ yơ lơ̆m kơ plăh pơjing păng hơtŏk tơiung doi athei hơmet ‘lơ̆ng 2 tơdrong lơ̆m teh đak păng teh đak ‘ngoăih, tơroi rơđăh tơdrong jang tơbôl ưh kơ sĭ jing tơdrong pơdui đunh đơ̆ng lơ̆m teh đak mă oei jing tưk tơiung pran kơtang ăn tơdrong hơtŏk tơiung kơ teh đak. Tơdrong dơ̆ng ‘noh jĭ đon tơchĕng đơ̆ng Tổng Bí thư găh tơdrong athei pơm liơ ling lang vei kơjăp trong jang tơbôl rơngei, hiôk hian lơ pang lơ trong. Việt Nam jĭ buăl hăm đĭ đăng teh đak, jĭ teh đak jang lơ̆m khŭl ‘lơ̆ng jang tơnăp lơ̆m tơpôl apŭng plĕnh teh; vei kơjăp đon tơchĕng, tơdrong kăl hơmet pơ ‘lơ̆ng hrĕnh rim tơdrong đei ƀôh, ling lang băt hơdăh tơdrong ‘nao, đei ƀôh tôch kơ hrĕnh đơ̆ng tơdrong lơ̆m teh đak păng lơ̆m apŭng plĕnh teh. Mă loi ‘noh jĭ sư ling lang pơma hơdăh, tơdăh glăi găh trong yak gô hơnhăk truh glăi pơđĭ đăng”.

Tổng Bí thư Nguyễn Phú Trọng ling lang pơma hơdăh lơ̆m tơdrong jang tơbôl athei: “kơjăp găh tơdrong kăl hai, hiôk găh trong jang hai; rơmuăn; hơgei mă lei kŭm tôch kơ tang, hơbĕch hơbal, pơcheh hơgei mă lei tôch kơ nuih tơ̆ hơnăp rim tơdrong mơmat tat, long nol, yua kơ tơdrong rơngei hơdrĕch hơdrŭng, yua kơ tơdrong hiôk hian kơ kon pơlei; 1 jơhngơ̆m đon, ‘mêm mơ nat mă lei hơdrin kơtang vei lăng đei yua ăn teh đak - hơdrĕch hơdrŭng”. Păng tơdrong tơ̆ Hop akŏm Jang tơbôl lơ̆m teh đak sơnăm 2021, Tổng Bí thư Nguyễn Phú Trọng mĭnh ‘măng dơ̆ng pơma hơdăh đon tơchĕng; “Jang tơbôl Việt Nam athei tơtĕnh, kơchăng hơgei păng rơmuăn hloh pơyua ăn hơtŏk tơiung mŭk drăm păng hơ tŏk loi dơ̆ng anih dơ̆ng teh đak”... ăn ƀôh tơdrong bơngơ̆t truh mă oei jing tơdrong tơtăm đơ̆ng kơdră chĕp kơ̆l tih hloh kơ teh đak hăm tơdrong jang tơbôl. Ưh kơ đei tŏ sĕt ‘măng, Tổng Bí thư Nguyễn Phú Trọng hlôi tơtă akhan: păih rŏng dôm bơngai jang tơbôl ling lang đei đĭ đăng Đảng, đĭ đăng kon pơlei, đĭ đăng lĭnh. ‘Noh jĭ tơdrong tơm vă dôm Bơngai tang măt bơ̆jang ‘lơ̆ng hơnăp jang: vei lăng đei yua ăn teh đak, hơdrĕch hơdrŭng păng tŭn pran jang hơdai apŭng plĕnh teh, pơyua ăn hơtŏk tơiung mŭk drăm tơpôl teh đak.

 PGS. TS Dương Văn Quảng, sơ̆ pơm Kơdră vei lăng Học viện Ngoại giao (Anih tơm jang tơbôl) akhan: tơroi kơ ƀok Tổng Bí thư Nguyễn Phú Trọng ‘noh jĭ tơroi găh tơdrong hơiă đơ̆ng 1 ‘nu bơngai “tơ̆k tơ hnit ŭnh”, tơƀôh tơdrong ‘lơ̆ng ăn tơdrong jang tơbôl Việt Nam: “Tổng Bí thư Nguyễn Phú Trọng rim ‘măng hop akŏm jang tơbôl lai yơ kŭm đei dôm ƀai pơma vă tơtă kơ kang ƀô̆ jang tơbôl Việt Nam. Dôm nơ̆r tơtă ‘noh jĭ 1 ‘nu bơngai jang tơbôl chăl hle ưh kơ gơh hiơt tơdrong joăt joe. Jang tơbôl athei đei ƀôh đơ̆ng đei yua ăn teh đak, hơdrĕch hơdrŭng, hơdai hăm bơngai chăl ‘nâu athei đei hlôh vao ‘nao, trong jang ‘nao păng athei jang tơchĕng hơlen. Bơ̆n hlôh apŭng plĕnh teh ‘mơ̆i mă gơh pơma đam đei hăm đe sư. ‘Noh jĭ nơ̆r tơtă đơ̆ng Tổng Bí thư hăm tơdrong jang tơbôl  Việt Nam”.

 Oei Bơngai tang măt ăn Việt Nam tơ̆ Liên bang Nga Đặng Minh Khôi ling lang ƀlŏk nơ̆r tơtă đơ̆ng kơdră chĕp kơ̆l tih hloh teh đak - ‘noh jĭ rim ‘nu bơngai Tang măt, Kơdră tang măt ăn anih jang Việt Nam tơ̆ teh đak đe athei tơƀôh đei joh ayŏ, ‘lơ̆ng hơiă, tơm đơ̆ng bơngai Việt. Mă loi ‘noh dôm bơngai jang tơbôl oei athei pơtrŭt jơhngơ̆m đon tơgoăt tơgoăl ‘mêm kơ eng, băt jur tŏk, băt tơdrong, băt bơ̆n băt kơ đe, băt tơplih ‘lơ̆ng. Đĭ đăng yua kơ tơdrong đei yua kơ teh đak, hơdrĕch hơdrŭng: "Tổng bí thư Nguyễn Phú Trọng akhan jang tơbôl Việt Nam athei tơƀôh đei joh ayŏ, ‘lơ̆ng hơiă, tơm kơ kon bơngai Việt Nam. Lơ̆m dôm tơdrong đei ƀôh hơ yơ, kŭm adoi kơtang, kơjăp mă lei rơ muăn hơbĕch hơbal nhen ‘long kram, ling lang đei jơhngơ̆m đon yak tŏk, mă đơ̆ng tơdrong hơyơ kŭm ling lang vei kơjăp trong yak".

Bơngai tang măt ăn Trung Quốc tơ̆ Việt Nam Hùng Ba pơma hơdăh: Dôm sơnăm tơ jê̆ âu, Việt Nam bơ̆jang kiơ̆ trong jang tơgŭm “jang tơbôl ‘Long Kram” hơbĕch hơbal găh trong jang, kiơ̆ lơ̆m vei kơjăp pơm tơm kơdih, hơdrin hơtŏk tơiung pơvei tơbôl hăm dôm teh đak lơ̆m apŭng plĕnh teh. Tơdrong jang tơbôl đơ̆ng Việt Nam hlôi iŏk đei jơnei gĭt kăl, tơgŭm hơdrol hơtŏk tơiung pơvei hăm dôm teh đak tơ jê̆, teh đak tih păng dôm teh đak jang hơdai tơbôl joăt joe; vei kơjăp tơgŭm trong jang lơ pang.

Dôm jơnei ‘noh hơnhăk tơdrong hơiă đơ̆ng “bơngai tơ̆k tơhnit ŭnh” - Tổng Bí thư Nguyễn Phú Trọng. Păng đon tơchĕng đơ̆ng ƀok gô hơnơ̆ng jing tơdrong ‘lơ̆ng vă jang tơbôl Việt Nam yak hloh mơmat tat, ưh kơ dŭn tơ̆ hơnăp tơdrong pơgăn mơmat tat lơ̆m 1 apŭng plĕnh teh lơ tơdrong tơplih nhen hrei ‘nâu.