'Măng jang sơlam apŭng plĕnh teh Hữu Nghị oei tơ̆ trong gre kơ sô̆ 1A, hơtăih kơ pơlei tơm Lạng Sơn 17 km tơ̆ găh tu, hơtăih kơ Hà Nội 171 km tơ̆ găh hơlĕch tu. Hơnih pơgơ̆r dôm tơdrong jang mơ̆t lĕch đơ̆ng Việt Nam păng Trung Quốc. Tơ̆ ‘măng jang sơlam apŭng plĕnh teh Hữu Nghị đei jrăng sơlam 1116 pơklep grat kơ teh đak Cộng hòa xã hội chủ nghĩa Việt Nam gĭt kăl kơ teh đak, ‘nâu jĭ hơnih blŭng trong gre kơ sô̆ 1A tơƀưh Lạng Sơn hăm Mũi Cà Mau. ‘Măng jang sơlam apŭng plĕnh teh Hữu Nghị jĭ hơnih gĭt kăl lơ̆m trong gơlang mŭk drăm, tơgop pơtrŭt hơtŏk tơiung mŭk drăm đơ̆ng Việt Nam păng Trung Quốc kŭm hăm dôm teh đak lơ̆m tơring ASEAN. Trong gơlang tơm ‘noh: Nam Ninh - Lạng Sơn - Hà Nội - Hải Phòng kiơ̆ nhen drơ̆ng nơ̆r đơ̆ng kơdră kơpal kơ 2 teh đak... Tơ̆ âu Tổng Bí thư Nguyễn Phú Trọng hlôi apĭnh jet gia pơma dơnuh păng asong tơmam ăn khŭl linh kơpal bơ̆jang tơ̆ tơring ‘măng jang sơlam. ‘Măng âu Tổng Bí thư Nguyễn Phú Trọng đei jơ pơma dơnuh hăm Bơngai tang măt teh đak Trung Quốc tơ̆ Việt Nam Hùng Ba.

Tổng Bí thư Nguyễn Phú Trọng athei, dêh char Lạng Sơn păng khŭl linh kơ pal tơ̆ ‘Măng jang sơlam apŭng plĕnh teh Hữu nghị hơnơ̆ng hơtŏk, tơgop ‘lơ̆ng hloh dơ̆ng, tơgop pơtrŭt tơdrong pơvei jang hơdai Việt Nam - Trung Quốc roi ‘năr roi hơtŏk tơiung. Hơdrol ‘noh, blŭng jơ kơ sơ̆ 25/8, Tổng Bí thư Nguyễn Phú Trọng kŭm hăm khŭl bơ̆jang truh năm ngôi asong tơmam ăn ŭnh hnam ƀok Nguyễn Xuân Khoát, kang ƀô̆ kră jang kach mang păng ŭnh hnam yă Bạch Thị Khôi kang ƀô̆ iung tơblăh chăl blŭng a sơ̆ tơ̆ pơlei tơm Lạng Sơn.