Tơ̆ jơ bơ̆ jang, tơblŏk dơ̆ng dôm tơdrong ‘lơ̆ng hơ iă đunh kơ au 10 sơnăm găh năm ngôi păng bơ̆ jang tơ̆ dêh char Lạng Sơn, Tổng Bí thư Nguyễn Phú Trọng pơma tơbăt jơhngơ̆m đon chơt hơ iă tơ̆ hơnăp dôm tơdrong tơplih đơ̆ng dêh char păng jei tơƀôh hơdăh dôm tơdrong tim mă lăp, tim mă ‘lơ̆ng nhen: Tơdrong jang mŭk drăm dêh char oei iĕ; atŏk tơ iung tim mă tơgăl hăm tơdrong đei, tơdrong rơvơn atŏk tơ iung kơ dêh char.

Tơdrong jang tơjur dơnuh păng tơjur dơnuh kơjăp ‘lơ̆ng oei đei lơ tơdrong tơnap tap, mă kăl tơ̆ tơring atăih yăih, tơring groi kông, tơring kon kông ... Găh tơdrong jang lơ̆m khei năr kơnh, Tổng Bí thư Nguyễn Phú Trọng athei, Hơnih Đảng dêh char Lạng Sơn tơlĕch trong jang păng jang kơtang, vă akŏm chĕp pơgơ̆r, pơrô̆ jang, pơjing hơyak tơplih ‘nao, pran kơtang hloh dơ̆ng, lơ̆m atŏk tơ iung mŭk drăm-tơpôl, nhen Tơdrong tơchơ̆t Pơm lêh hop akŏm Đảng dêh char hlôi sơkơ̆t hơdăh. Lơ̆m au akŏm sơkơt hơdăh, atŏk tơ iung mŭk drăm ‘măng sơlam teh đak ưh khan lăp vă atŏk tơ iung mŭk drăm kơ dêh char mă gĭt kăl hlŏh dơ̆ng ‘nŏh vă tơgop atŏk tơ iung mŭk drăm kơ teh đak, mă kăl ‘noh rim dêh char găh Tu, adoi atŏk kơtang tơgoăt tơgoăl ‘lơ̆ng hơ iă hăm teh đak boăl Trung Hoa.