Lơ̆m dôm tơdrong tơgop đơ̆ng Tổng bí thư Nguyễn Phú Trọng mă gĭt kăl hloh ‘noh ‘măng iung tơdră tang găn sa pơgơ̆m pơjĭp, pơm tơdrong glăi dăh mă tơdrong tơ iung pơjing, hơmet pơ ‘lơ̆ng rim tơdrong pơkăp, tơdrong tơchơ̆t lơ̆m Đảng hlôi tơgop tih tên, xek tơlang dôm tơdrong long, tơnap tap hloh kơ teh đak lơ̆m chăl sơnăm atŏk tơ iung ‘nao.

“ ‘Măng soh pôi” hlôi jing nơ̆r pơma joăt joe lơ̆m tơpôl mưh pơma truh bơ̆ jang tang găn sa pơgơ̆m pơjĭp, tơdrong glăi kơ yuơ Đảng pơjing păng Tổng bí thư Nguyễn Phú Trọng ‘noh bơngai chĕp pơgơ̆r đơ̆ng jăl jang Pơm lêh hop akŏm 11 truh dang ei.

PGS, TS Lê Văn Cường, Kơ iĕng Kơdră chĕp pơgơ̆r Viện Xây dựng Đảng, Học viện Chính trị Quốc gia Hồ Chí Minh ling lang ƀlŏk hơdơ̆r Tổng bí thư Nguyễn Phú Trọng kơtoh đak măt ƀơ̆t pơgơ̆r pơtôch Hop akŏm Trung ương 6 jăl 11, năr 15 khei 10 sơnăm 2012. ‘Noh kơtoh đak măt ơ̆h sơ-‘ngon kơ mĭnh ‘nu chĭu pŭ chĭnh trĭ tơm dơnơm hloh tơ̆ hơnăp Đảng, tơ̆ hơnăp kon pơlei mưh “Ưh kơ tŏ sĕt kang ƀô̆, đảng viên” hlôi đei jơhngơ̆m đon kơnê̆. Kơtoh đak măt ‘noh hlôi jing jơhngơ̆m pran, pơm ăn kơrŭn đĭ ai kơ pơđĭ lơ̆m Đảng, lơ̆m kon pơlei găh ‘măng iung tơjră tang găn sa pơgơ̆m pơjĭp, pơm tơdrong glăi:“Mư̆h tơlĕch ‘măng iung tơjră tang găn sa pơgơ̆m pơjĭp, pơm tơdrong glăi ‘noh Tổng bí thư Nguyễn Phú Trọng hlôi bơ blơ̆n đak măt. Kơ yuơ kă kiơ?, Kơ yuơ Tổng bí thư pơma bơih, bơ̆n iung tơblăh hăm sa pơgơ̆m pơjĭp, pơm tơdrong glăi ‘noh tơblăh kơdih bơ̆n, gơ̆h sơ-‘ngon dêh, ưh kơ ‘meh iung tơjră phă pơrăm hăm bôl boăl bơ̆n, pă bĭ bu ‘meh kih luơ̆t. Bôl boăl bơ̆n bơ̆h ƀơm pơm lei bơ̆n jei ưh kơ lon, xek tơlang mă keh, ưh kơ đei hơnih kơ̆m, hơnih lon, mă đơ̆ng bơngai bu. Tơ̆ ou, tơdrong chhưu lơ̆m jơhngơ̆m đơ̆ng Tổng bí thư pơm mơ̆t lơ̆m jơhngơ̆m, lang să kơtang, pơm ăn kơ bơ̆n ưh kơ hul hơl, ưh kơdŭn tơ̆ rŏng, mă lei jei ưh kơ gơ̆h bơhơi. Ăp lơ loh ‘nei mă tơgăl hăm tơdrong jang mă Đảng păng kon pơlei hlôi pơjao ăn”.

Iŏk jang hloi kơchư̆k “Yŏng chĕp pơgơ̆r”- Kơdră Hơnih jang Chĕp pơgơ̆r, Tổng Bí thư Nguyễn Phú Trọng hlôi atŭm hăm kon pơlei iung tơblăh tang găn sa pơgơ̆m pơjĭp hăm jơhngơ̆m đon tơpăt, ưh kơ đei hơnih lon. Lăp jô̆ hơdrô̆ đơ̆ng jăl jang Pơm lêh hop akŏm 13 truh dang ei, Khul kơdră chĕp pơgơ̆r Trung ương, Hơnih tơm Chinh trĭ, Ban Bí thư hlôi ki luơ̆t 44 khul Đảng păng 164 ‘nu đang viên, lơ̆m ou đei 13 ‘nu kơdră jang lơ̆m Khul kơdră chĕp pơgơ̆r Trung ương, 17 ‘nu Kơdră so jang lơ̆m Khul kơdră chĕp pơgơ̆r Trung ương păng 19 ‘nu si kuan tih lơ̆m khul ƀô̆ đô̆i; 19 ‘nu kơdră jang lơ̆m Khul kơdră chĕp pơgơ̆r Trung ương păng Kơdră jang lơ̆m Hơnih tơm Chinh trĭ đei ăn pơdơ̆h bơ̆ jang. Tơdrong yan ou ‘nou nhen nơ̆r đơ̆ng Tổng bí thư Nguyễn Phú Trọng- mă đơ̆ng “ tôch jĭ đon” mă lei hlôi tơgop hơmet pơ ‘lơ̆ng jơhngơ̆m đon lui yom kơ kon pơlei hăm tơdrong chĕp pơgơ̆r kơ Đảng.“ ‘Măng iung tơblăh tang găn sa pơgơ̆m pơjĭp kơ yuơ Đảng chĕp pơgơ̆r, chĕp kơ̆l ‘noh ƀok Tổng Bí thư Nguyễn Phú Trọng đei tơlĕch jang tôch ‘lơ̆ng hơ iă, pran kơtang, trŏ lăp. Bơ̆n đĭ tơchơ̆t kơrŭn đĭ ai, hlôi tơlĕch iung tơblăh tang găn sa pơgơ̆m pơjĭp ou lang să jơ̆p jang lơ̆m kon pơlei pơla. Ĭnh lui, hăm tơdrong iung jang nhen hrei ou ‘măng iung tơblăh tang găn sa pơgơ̆m pơjĭp Việt Nam kơ yuơ Đảng chĕp pơgơ̆r gô ling lang jang kiơ̆ kơjăp, ưh kơ đei tơplih yă kiơ ôh".

Ư̆h khan hăm dôm tơdrong jang yan ou, ‘măng iung tơblăh tang găn sa pơgơ̆m pơjĭp, pơm tơdrong glăi oei đei Tổng bí thư Nguyễn Phú Trọng hơlen jing nơ̆r hơlen trŏ lăp ‘moi kiơ̆ ƀai chih “Kơrŭn đĭ ai, hơdrin iung tơjră tang găn sa pơgơ̆m pơjĭp, pơm tơdrong glăi, tơgop tơ iung pơjing Đảng păng Teh đak bơ̆n roi năr roi rơgoh ‘lơ̆ng, pran kơjăp”. PGS.TS Vũ Tình, sơ̆ jang Kơ iĕng Kơdră chĕp pơgơ̆r hnam trương Đăi hŏk Khoa học Xã hội và Nhân văn, Đại học Quốc gia TP.HCM sơkơ̆t hơdăh, kơsơ̆p hla bơar "Tơdrong răk kăl" ăn dôm bơngai bơ̆ jang tang găn sa pơgơ̆m pơjĭp, pơm tơdrong glăi:“Jơhnơr mơlôh kăl băt hlôh ƀôh nhên bơ̆n kăl pơhrăm tơdrong jang, jơhngơ̆m chơ̆n kơ bơ̆n lơ liơ lơ̆m mă rim ayăt tơchă rim trong vă phă pơrăm tơdrong jang tang găn sa pơgơ̆m pơjĭp păng pơm tơdrong glăi. ‘Moi kiơ̆ kơsơ̆p hla bơar ou, jơhnơr mơlôh kăl băt hlôh ƀôh hơdăh hloh dơ̆ng hơnăp jang kơ bơ̆n hăm teh đak, hăm hơdrĕch hơdrung, kăl pơhrăm mă brĕ, pơhrăm tơdrong bơ̆ jang lơ liơ vă tơgăl jĭ dôm bơngai tŏk bŏk păng gô jing tơ-‘ngla kơ teh đak hơnô̆ hơnăp kơnh”.

Hăm trong chĕp pơgơ̆r đơ̆ng Tổng bí thư Nguyễn Phú Trọng, bơ̆ jang iung tơjră tang găn sa pơgơ̆m pơjĭp, pơm tơdrong glăi đei iung jang ting ring hăm bơ̆ jang kang ƀô̆. Hăm trong tơlĕch ăn adoi vei kơjăp tơdrong pơkăp ‘lơ̆ng, adoi tơƀôh hơdăh tơdrong ‘lơ̆ng rŏ ‘mêm mơnat dih băl; đơ̆ng jăl jang Pơm lêh hop akŏm 11 truh dang ei, Đảng bơ̆n hlôi pơjing lơ tơdrong tơchơ̆t hơdăh. Lơ̆m ou, tơdrong “ăn pơdơ̆h hloi”, “ư̆h kơ pôk tơmơ̆t dơ̆ng”  đei tơchơ̆t hơdăh tơ̆ Tơchơ̆t kơsô̆ 41 năr 3/11/2021 kơ Hơnih tơm Chinh trĭ jăl 13 ‘noh mĭnh lơ̆m dôm tơdrong kăl hloh, pơjing đei hơyak pran lơ̆m tơdrong iung jang hơdoi kơjăp ‘lơ̆ng ƀar păh hŏk pơhrăm, jang kiơ̆ jơhngơ̆m đon ‘lơ̆ng, trong jang hơgei kơ Ƀok Hô hăm bơ̆ jang tơ iung pơjing, hơmet ming pơ ‘lơ̆ng Đảng:

Giáo sư, Tiến sĩ Tạ Ngọc Tấn, sơ̆ jang kơdră Trung ương Đảng, Kơ iĕng kơdră chĕp pơgơ̆r Jơnŭm lý luận Trung ương sơkơ̆t hơdăh, tim lăh đei Đảng bơ̆n đei dôm tơdrong tơchơ̆t tôm tong đei ƀơm truh bơ̆ jang kang ƀô̆ nhen hrei ou. Tơdrong jơnei ‘noh jĭ tơdrong plang ăn đĭ jơhngơ̆m đon, hơnăp jang kơtang đơ̆ng Tổng bí thư Nguyễn Phú Trọng lơ̆m prăt vă jê̆ 3 jăl jang:“Lơ̆m rim tơdrong hơlen pơtôch bơ̆ jang kơ rim jăl Pơm lêh hop akŏm ‘noh rim hla bơar tơbăt chinh trĭ jei pơma hơdăh tơdrong tim mă pran kơtang oei găh tơdrong pơgơ̆r jang kiơ̆. Păng ‘meh vă pơgơ̆r jang kiơ̆ ‘lơ̆ng lei kăl đei dôm tơdrong pơkăp, tơchơ̆t tôm tong. Khul kơdră chĕp pơgơ̆r Trung ương kơ yuơ Tổng bí thư Nguyễn Phú Trọng chĕp kơ̆l hlôi pơjing keh đang dôm tơdrong tơchơ̆t, dôm tơdrong pơkăp lơ̆m bơ̆ jang kơ Đảng, đơ̆ng tơdrong pơgơ̆r, trong bơ̆ jang kơ rim kơdră đảng truh rim hơnih bơ̆ jang, tơdrong iung jang hơdoi ƀar păh hơnih bơ̆ jang ... vă pơm pơkeh trong bơ̆ jang lơ̆m bơ̆ jang Đảng. Păng mưh bơ̆n hlôi đei tơdrong pơkăp, tơchơt tôm tong, trŏ lăp, gơ̆h hơgei păng pran kơtang ‘noh lơ̆m mă noh gô đei hơnăp jang tôch gĭt kăl lơ̆m atŏk kơtang hơnăp jang chĕp pơgơ̆r đơ̆ng Đảng, atŏk kơtang iŏk đei jơnei chĕp pơgơ̆r păng chĕp kơ̆l kơ Đảng”.

Hăm dôm tơdrong tơgop gĭt kăl ăn tơdrong jang kĕch mang kơ Đảng, kăl chă pơma lơ lou, Tổng bí thư Nguyễn Phú Trọng ‘noh jĭ mĭnh ‘nu bơngai pơ-‘nhŏ ăn vă xek tơlang dôm tơdrong tơnap tap, tơdrong long lơ̆m mĭnh chăl sơnăm kơ teh đak.

Apĭnh pơtôch ƀai chih ƀơ̆t dou hăm dôm nơ̆r ƀơ̆r pơma mơ̆t lơ̆m jơhngơ̆m đon đơ̆ng Tổng bí thư ƀơ̆t khei ‘năr oei hơrih sơ̆. Rim ‘măng ‘meh vă pơma tơbăt jơhngơ̆m đon kơdih, ƀok hơnơ̆ng pơma tơbăt dơ̆ng, chă pơtih mĭnh ƀar nơ̆r pơma tôch trŏ lăp đơ̆ng bơngai hơnăn Pa-ven Kốp-cha-gin lơ̆m kơsơ̆p hla bơar tơroi hle đe ư hơhang ang hơnhăk “Mam đei hling lơ loh văi" đơ̆ng bơngai chih tơdrong tơroi hle Liên Xô Nhi-cô-lai Ốt-xtơrốp-xki. ‘Nou jei jing tơdrong tôch lăp mă Tổng bí thư Nguyễn Phú Trọng ling lang druh kiơ̆ prăt jơhnơr hơrih:  “Tơdrong kăl hloh kơ kon bơngai ‘noh tơdrong hơrih sa păng tơdrong yom lơ̆m hơrih sa, kơ yuơ chăl hơrih kon bơngai lăp hơrih mĭnh ‘măng. Kăl hơrih sa lơ liơ vă hoei jĭ jơhngơ̆m, ơ̆h sơ-‘ngon kơ yuơ prăt chăl sơnăm hơrih sa ‘lơ̆ng, hơrih sa ưh kơ ‘lơ̆ng; vă hoei kơdơ̆ akou mơlou kơdih kơ yuơ hơrih sa ưh kơ ‘lơ̆ng hơ iă, đei đe jô̆ jăm; mưh truh jơ ‘năr brŏk vih hăm mĕ ƀă yă ƀok, bơ̆n jei chơt hiôk akhan: Prăt chăl hơrih, pơđĭ jơhngơ̆m đon bơ̆n, bơ̆n hlôi plang ăn tơdrong jang gĭt kăl hloh lơ̆m chăl hơrih-tơdrong jang iung tơjră pơm rơngei ăn hơdrĕch hơdrung, pơm rơngei hiôk hian ăn kon bơngai, hơnhăk ba đei tơdrong hơrih sa hơnŭk hơnoa ăn kon pơlei!