Kơsơ̆ brei, tơ̆ Anih jang kơ ƀok Kơdră teh đak, Tổng Bí thư Nguyễn Phú Trọng pơgơ̆r lêh tih sơng Tổng Bí thư, Kơdră teh đak Trung Quốc Tập Cận Bình kiơ̆ trong sơng tih hlŏh ‘măn ăn Kơdră chĕp kơ̆l teh đak. Đơ̆ng rŏng kơ ‘nŏh, 2 ‘nu kơdră pơgơ̆r pơma đam, vang lăng dơ̆ng tơdrong jang tŏk đơ̆ng tơdrong pơvei kơ 2 Đảng, 2 teh đak, drơ̆ng nơ̆r akhan, tơdrong pơ vei ‘lơ̆ng hơiă đơ̆ng sơ̆, pơm boăl juăt hai, pơm ‘nhŏng oh hai yoa Ƀok Hô păng ƀok Kơdră Mao Trạch Đông kŭm hăm dôm kơdră chĕp kơ̆l chăl adrol sơ̆ pơjing păng tưk tơiung ‘nŏh jĭ tơmam tôch kăp gĭt đơ̆ng kon pơlei 2 teh đak, athei hơnơ̆ng atŏk tơiung păng chĕp vei kơjăp.

Ƀar păh drơ̆ng nơ̆r pơjing Tơpôl tơgŭm băl tơ̆ ning mông kơnh kơ Việt Nam - Trung Quốc ‘nŏh tôch gĭt kăl, adrin yoa tơdrong hiôk chơt kơ kon pơlei 2 teh đak, yoa tơdrong rơngei păng gơ̆h hơgei kơ kon bơngai, lăp hăm Tơdrong tơchơ̆t Liên hợp quốc păng luơ̆t apŭng plenh teh, ‘moi kiơ̆ tơdrong năng kăl băl, jang hơdoi hơtŏ ‘lơ̆ng 2 păh đei yoa ngăl, năng kăl tơdrong pơm tơm teh đak kơdih, vei lăng kơjăp ‘lơ̆ng teh đak, adrin sek tơlang dôm tơdrong ưh kơlăp băl kiơ̆ trong jang rơngei. Đơ̆ng rŏng kơ pơma đam tih, 2 ‘nu ƀok Tổng Bí thư vang dơ̆ng lăng păng mơ̆ng nơ̆r roi tơbăt găh 36 Hla ar drơ̆ng nơ̆r jang hơdoi găh lơ tơdrong đei kĭ pơkăp.

Tổng Bí thư Nguyễn Phú Trọng tơm Tổng Bí thư, Kơdră teh đak Trung Quốc Tập Cận Bình truh et ngôi đak tra. 2 ‘nu ƀok Tổng Bí thư vang mơ̆ng nơ̆r roi tơbăt dôm tơmam hla che đei ư hơnhang kơ Việt Nam păng tơdrong juăt et ngôi hla che đơ̆ng bơngai Việt, hơdai hăm ‘nŏh roi tơƀôh dôm tơdrong vă lei lăi băl găh tơdrong jŏh ayŏ kơ dŏ xoang đơ̆ng 2 hơdrĕch. Gơmăng lơ̆m năr, Tổng Bí thư Nguyễn Phú Trọng păng hơkăn ƀok, kŭm hăm Kơdră teh đak Võ Văn Thưởng păng hơkăn sư pơgơ̆r et xa tih hơiă kơ Tổng Bí thư, Kơdră teh đak Trung Quốc Tập Cận Bình păng hơkăn sư truh hơpong tơ̆ teh đak Việt Nam.