Hop akŏm 14 jing gru kơnăl kăp gĭt, sơkơ̆t khei năr hơnô̆ hơnăp kơnh, hơlêm tôm Đảng, tôm kon pơlei, tôm khul linh pơtoi hơtŏk pran tôm tơdrong, drơ̆ngminh tơdrong jang tơplih ‘nao, hơ-‘nhăk teh đak hơtŏk tenh păng kơjăp sơđơ̆ng kơyuơ pơkăp kon pơlei pơdrŏng, teh đak pran, rơngei hiôk hian, hơtŏ hơnơ̆ng yak tŏk chuh nghĩa xah hô̆i.

Kơyuơ noh, vă hơmet bơngai jang ăn Hop akŏm 14 kơ Đảng, tơdrong kăp gĭt hloh noh athei sơkơ̆t mă trŏ pơkăl pơjing Ƀan châ̆p hanh Trung ương mă tơm noh Anih tơm Chĭnh trĭ, Ƀan ƀĭ thư, đe kơdră dơnơm kơ Đảng, rim bơngai tang măt sơkơ̆t hơdah, tơdrong hơmet bơngai jang ăn Hop akŏm 14 kơ Đảng ưh hơdrô̆ jing sơnong jang kơ Jơnŭm asong bơngai, kơ Anih tơm Chĭnh trĭ, Ƀan ƀĭ thư, Ƀan châ̆p hanh Trung ương mă jing sơnong jang kăp gĭt kơ tôm anih jang chĭnh trĭ, kơ dôm jăl jang, anih jang đảng, rim anih jang păng rim tơring. Mă kăl noh athei jang tơnăp tơdrong asong bơngai jang ăn hop akŏm anih jang đảng dôm jăl vă tơgop hơmet tơnăp bơngai jang ăn Hop akŏm 14 kơ Đảng, tơgop đei jơnei atŭm kơ Hop akŏm Đảng jơ̆p teh đak ‘măng 14, kơchĕng gô vă pơgơ̆r ah jăl 1/2026.