Hop akŏm hơlen, 2 khei ou ki, Đảng, kon pơlei, ƀô̆ đô̆i bơ̆n hlôi hơdrin iŏk đei jơnei gĭt kăl lơ̆m rim tơdrong: Atŏk tơ iung mŭk drăm-tơpôl, vei lăng sơđơ̆ng teh đak sơđơ̆ng tơpôl, jang tơbôl, tơ iung pơjing Đảng păng khul jang chinh trĭ, bơ̆ jang kang ƀô̆ păng bơ̆ jang tang găn sa pơgơ̆m pơjĭp.

Găh mĭnh ƀar tơdrong kăl lơ̆m khei năr kơnh, Tổng Bí thư pơma hơdăh, ‘ngoăih dôm tơdrong rơvơn, bơ̆n tŏk bŏk păng gô tơjră muh măt hăm lơ tơdrong tơnap tap, tơdrong long kơ yuơ tơdrong lơ̆m apŭng plĕnh teh hơnơ̆ng ưh sơđơ̆ng, ưh kơ ê, tơgar dih băl tôch kơtang ƀar păh teh đak tih pơdrŏng, tơblăh vang kơtang; tơplih tŏ ‘mi kial, to ‘mi kial pơrăm, pơrang jĭ pơrăm kơtang, kơ yuơ lơ loh rim hơnih jang kăl hơnơ̆ng iung jang ‘lơ̆ng hloh dơ̆ng jơhngơ̆m đon tơgoăt tơgoăl pôm nơ̆r ƀơ̆r đon, drơ̆ng mĭnh nơ̆r; iung jang hơdoi ‘lơ̆ng, chĕp pơgơ̆r jang kiơ̆ rim tơdrong jang đei jơnei. Akŏm jang ‘lơ̆ng rim tơdrong hơmet ăn chĕp pơgơ̆r Pơm lêh hop akom Đảng rim hơnih lăng truh Pơm lêh hop akŏm mă XIV kơ Đảng; akŏm jang keh đang trong pơjing rim hla bơar pơkăp Pơm lêh hop akŏm mă XIV kơ Đảng vă pơtruh ăn Hop akŏm Trung ương 10 kiơ̆ pơprŏ hơdrol, dăr lăng, tơmơ̆t dơ̆ng trong pơprŏ jang rim hơnih vă hơmet ăn ‘lơ̆ng hơ iă khul kơdră chĕp pơgơ̆r pơm lêh hop akŏm Đảng rim hơnih.