Kiơ̆ tơbăt tơ̆ hop akŏm, Hơnih tơm Ƀô̆ đô̆i păng Khul kơdră jang Đảng, kơdră chĕp pơgơ̆r rim hơnih ƀô̆ đô̆i hlôi pơrô̆ chĕp pơgơ̆r pơđĭ khul ƀô̆ đô̆i tơgoăt tơgoăl, hrơ̆p mĭnh ƀơ̆r đon, iung jang hơmet pơ ‘lơ̆ng tơnap tap, jang keh đang tơdrong jang đei pơjao. Lơ̆m au, mă kăl ‘nŏh iung jang chă tơchĕng, hơlen ƀlep tơdrong, pơchoh trong, tơlĕch nơ̆r apinh hăm Đảng, Teh đak xek tơlang keh đang rim tơdrong, ưh kơ lê̆ đei ƀôh ưh kơ ê, vei lăng năng tông kơjăp pơm tơm kơ dih groi teh kơ Teh đak.

Tơlĕch jang kiơ̆ ‘lơ̆ng rim tơdrong tơchơ̆t đơ̆ng Quân ủy Trung ương găh pơtho pơhrăm tơblăh, pơtho pơhrăm ‘lơ̆ng hơ iă, pơlong, hop akŏm pơma dơnuh tơ̆ rim hơnih bơ̆ jang păng rim hnam trương đei atŏk ‘lơ̆ng. Tơdrau khei hơtuch sơnăm, Quân ủy Trung ương sơkơ̆t hơdăh mĭnh ƀar tơdrong jang kăl akŏm chĕp pơgơ̆r, pơrô̆ jang lơ̆m bơ̆ jang vei lăng sơlam teh đak, lơ̆m au hơnơ̆ng tơ iung pơjing Hơnih Đảng Ƀô̆ đô̆i pran kơtang găh chinh trĭ jơhngơ̆m đon, hơnih jang păng kang ƀô̆; Khul Ƀô̆ đô̆i pran kơtang găh chinh trĭ. Akŏm chĕp pơgơ̆r, pơrô̆ jang kiơ̆ rim tơdrong jang kăl truh đĭ jăl jang Pơm lêh hop akom mă XIII kơ Đảng, rim tơdrong tơchơ̆t, nơ̆r pơma pơtôch găh tơdrong jang khul linh, vei lăng sơlam teh đak, vei lăng Teh đak lơ̆m chăl hle.