Tổng Bí thư Nguyễn Phú Trọng hôn bơnê Kơdră chĕp pơgơ̆r Kuôk hô̆i Cuba tang măt ăn kơdră chĕp pơgơ̆r Đảng, Teh đak Cuba, vang năm Pơm lêh tơbăt ‘măng mă au, tơbăt hơdăh tơdrong yom kơtang đơ̆ng Đảng, Teh đak Cuba ‘nhŏng oh hăm tơgoăt tơgoăl gĭt kăl Việt Nam - Cuba. 

Tổng Bí thư Nguyễn Phú Trọng sơkơ̆t hơdăh, Việt Nam ling lang lăng kơjăp, vei kơjăp păng kơrŭn đĭ ai pơm hơtŏk hloh dơ̆ng tơgoăt tơgoăl joăt joe păng jang hơdoi tôm tong Việt Nam-Cuba păng tơbăt jơhngơ̆m đon ling lang tơgoăt tơgoăl kơjăp, tơgŭm djru Cuba, tơjră tang găn păng krao hơvơn pơtôch hloi trong jang pơvang tang găn teh đak Cuba. Ƀar ‘nu kơdră chĕp pơgơ̆r drơ̆ng mĭnh nơ̆r hơnơ̆ng hơmet pơ ‘lơ̆ng tơgoăt tơgoăl chinh trĭ ƀar păh ƀar Đảng, pơchoh trong ăn atŏk tơ iung jang hơdoi ƀar teh đak, athei rim hơnih tơm, hơnih bơ̆ jang, khul jang păng tơring ƀar teh đak jang hơdoi kơjăp, tơlĕch jang kiơ̆ ‘lơ̆ng rim tơdrong drơ̆ng mĭnh nơ̆r đơ̆ng kơdră kơpal, trong jang, tơdrong pơkăp hlôi kĭ pơkăp dih băl vă pơjing hơyak atŏk tơ iung ‘nao lơ̆m jang hơdoi mŭk drăm, mơdro sa, tơmơ̆t jên jang, choh jang sa, pơtho pơhrăm, kmăi kmŏk sinh hŏk, jang pơgang...