Tổng Bí thư Nguyễn Phú Trọng hôn bơnê, tơchĕng ‘lơ̆ng tơdrong gĭt kăl đơ̆ng ‘măng năm hơpong tơ̆ Việt Nam đơ̆ng Thượng tướng Álvaro López Miera ƀât mă 2 tĕh đak oei vă tơbăt 50 sơnăm Kơdră chĕp kơ̆l Fidel Castro năm hơpong tơ̆ tơring tơblăh iŏk rơngei tơ̆ Quảng Trị; tơƀôh đon lui ‘măng năm hơpong gô tơgop hơmet kơjăp păng pơm pơ ‘lơ̆ng hlŏh dơ̆ng tơdrong pơvei ‘lơ̆ng hơ iă, kăp gĭt đơ̆ng sơ̆ kơ 2 Đảng, 2 tĕh đak păng khul linh 2 tĕh đak. 

Tổng bí thư pơma hơdăh Việt Nam vă adrin đĭ jơhngâm, kiơ̆ tơdrong kĕ jang đơ̆ng Việt Nam vă tơgŭm ăn Cuba kiơ̆ jơhngâm đon “Yoa Cuba, Việt Nam vă adrin tôch ai kiơ̆ tơdrong gơ̆h jang đơ̆ng kơdih vă tơgŭm ăn Cuba tŏk klăih dôm tơdrong pơmat tat, pơlong nol kơplăh dang ei”. Tổng Bí thư tơchĕng ‘lơ̆ng hơnăp jang gĭt kăl păng dôm tơdrong jang đei mưh jang hơdoi găh khul linh đơ̆ng 2 tĕh đak; athei 2 păh hơtŏk tơdrong jang hơdoi mă ‘lơ̆ng, lăp hăm tơdrong đei yoa tơ̆ rim tĕh đak, yoa tơdrong rơngei păng jang tŏk tơ̆ tơring păng lơ̆m apŭng plenh tĕh.