Tơ̆ jơ sơng, Tổng Bí thư Nguyễn Phú Trọng sơkơ̆t hơdăh: Đảng, Teh đak păng kon pơlei Việt Nam ling lang ‘meh vă atŏk kơtang pơtrŭt tơgoăt tơgoăl jang hơdoi ƀar păh hăm Mông Cổ ‘noh jĭ teh đak bôl boăl joăt joe roi năr roi atŏk tơ iung tơpă hloh dơ̆ng rim tơdrong, trŏ lăp hăm tơdrong đei iŏk yua, tơdrong đei păng tơdrong ‘meh vă kơ ƀar păh.

Tổng Bí thư Nguyễn Phú Trọng pơma tơbăt jơhngơ̆m đon lui ‘măng năm tơmang Việt Nam đơ̆ng ƀok Ukhnaagiin Khurelsukh gô tơgop pơtrŭt kơtang hlŏh dơ̆ng tơgoăt tơgoăl joăt joe ƀar păh ƀar teh đak, mă kăl lơ̆m khei năr ƀar teh đak tŏk bŏk lăng truh tơbăt 70 sơnăm pơjing tơgoăt tơgoăl jang tơƀôl Việt Nam - Mông Cổ lơ̆m sơnăm 2024 kơnh.

Kơsơ̆ năr 1/11, đơ̆ng rŏng kơ tơdrong pơma đam, Kơdră teh đak bơ̆n Võ Văn Thưởng păng Kơdră teh đak Mông Cổ hlôi tơƀơ̆p băl chih hla bar tơroi, tơroi gah đei jơnei pơma đam. Hăm tơdrong tơnăp jang tơbôl juăt jue 'lơ̆ng rŏ, Ƀok Kơdră teh đak akhan, lơ̆m khei năr truh, tơbôl Việt Nam - Mông Cổ gô pơtoi đei hơtŏk 'lơ̆ng, hơyak pơjing tơchơ̆t tơbôl 'nao. Pơma ah hop akŏm hla bar tơroi, Kơdră teh đak bơ̆n Võ Văn Thưởng, sơkơ̆t hơdah, tơbôl jang hadoi juăt jue kơ 2 teh đak Việt Nam - Mông Cổ tok bŏk oei hơtŏk 'lơ̆ng, đei jơnei lơ tơdrong 'nao lơ̆m khei năr tơjê̆ âu, mă kăl noh đei jơnei gah dôm tơdrong jang chĭn trĭ, vei sơđơ̆ng tơpôl teh đak păng jang mŭk drăm. Vă hơtŏk tơbôl kơ 2 teh đak gơh 'lơ̆ng hloh, păng đei jơnei hloh lơ̆m khei năr truh, Kơdră teh đak bơ̆n ăn tơbăt, hlôi drơ̆ng nơ̆r hăm Kơdră teh đak Mông Cổ gah lơ trong jang kăp gĭt, lơ̆m noh drơ̆ng nơ̆r hơtŏk hloh 2 'măng tơmam tĕch răt kơ 2 pah truh 200 trĭu đôlar lơ̆m dôm sơnăm truh. Adrol kơ noh, Kơdră teh đak bơ̆n Võ Văn Thưởng păng Kơdră teh đak Mông Cổ hlôi bơ̆ng pang lêh kĭ pơkăp dôm hla bar jang hadoi kơ dôm anih jang dơnơm kơ 2 teh đak.