Tơ̆ jơ sơng, Tổng Bí thư Nguyễn Phú Trọng sơkơ̆t hơdăh, Việt Nam tơgŭm djru lơ̆m ‘măng tơ iung pơjing păng atŏk tơ iung teh đak Campuchia păng lui akhan Campuchia gô hơnơ̆ng iŏk đei jơnei hle, tih tên, tôm tong hloh dơ̆ng lơ̆m jang kiơ̆ Trong bơ̆ jang kơ Đảng CPP jăl jang 2023-2028 păng Trong jang kăl kơ Khul kơdră chĕp pơgơ̆r teh đak jăl VII tơlĕch ăn.

Tổng Bí thư athei ƀar păh tơlĕch jang kiơ̆ jơnei rim tơdrong ‘Măng tơƀơ̆p ƀar păh Kơdră kơpal ƀar Đảng păng ‘Măng tơƀơ̆p ƀar păh pêng ‘nu kơdră chĕp pơgơ̆r kơ pêng đảng Việt Nam-Campuchia-Lào; hơnơ̆ng tơplih ‘nao trong jang hơdoi ƀar păh ƀar đảng vă trŏ lăp hăm tơdrong ‘meh vă kơ chăl hle. Kiơ̆ kơ ‘noh, hơnơ̆ng lăng kơjăp tơgoăt tơgoăl chinh trĭ ‘noh kăl hloh ăn tơgoăt tơgoăl ƀar teh đak; hơmet pơ ‘lơ̆ng trong jang hơdoi tơm vei lăng teh đak, sơđơ̆ng; atŏk kơtang jang hơdoi lơ̆m bơ̆ jang tơbôl; pơjing hơyak pran, atŏk iŏk đei jơnei lơ̆m jang hơdoi mŭk drăm, joh ayŏ, pơtho pơhrăm, khoa hŏk-kih thuơ̆t păng pơtrŭt ăn kon pơlei năm ngôi dih băl.