Thủ tướng Hun Manet pơma tơbăt jơhngơ̆m đon chơt hơ iă mưh tơdrong tơgoăt tơgoăl dih băl Campuchia - Việt Nam roi năr roi hơmet pơ ‘lơ̆ng păng atŏk tơ iung lơ̆m rim tơdrong jang.

Ƀok Hun Manet tơbăt ăn Tổng Bí thư mĭnh ƀar tơdrong tơm găh tơdrong teh đak Campuchia tơjê̆ au, lơ̆m au đei tơdrong hơmet pơ ‘lơ̆ng khul kơdră chĕp pơgơ̆r kơ Kuô̆k hô̆i, Khul kơdră chĕp pơgơ̆r chăl hle păng pơtôch Pơm lêh Hop akŏm Đảng CPP adoi nhen ‘măng Pơma đam hăm Thủ tướng Phạm Minh Chính. Ƀar păh hlôi pơma dơnuh dih băl kơtang găh tơgoăt tơgoăl jang hơdoi lơ̆m lơ tơdrong, mă kăl ‘noh tơgoăt tơgoăl ƀar păh Đảng, jang hơdoi mŭk drăm, vei lăng sơlam teh đak-sơđơ̆ng tơring păng tơgoăt tơgoăl ƀar păh hơdruh tơdăm ƀar teh đak. Tổng Bí thư Nguyễn Phú Trọng pơma hơdăh, pêng teh đak Việt Nam - Campuchia - Lào tơgoăt tơgoăl pôm nơ̆r ƀơ̆r đon, tơgum djru dih băl yak hloh rim tơdrong tơnap tap, kơ yuơ lơ loh lơ̆m chăl hle, ƀar păh kăl hơnơ̆ng vei kơjăp, hơmet pơ ‘lơ̆ng hlŏh dơ̆ng ăn tơgoăt tơgoăl Việt Nam - Campuchia roi năr roi atŏk tơ iung.