Tơ̆ jơ sơng, Tổng Bí thư Nguyễn Phú rọng hôn bơnê kơ Thủ tướng Lý Hiển Long hăm Khul kơdră kơpal Singapore năm tơmang Việt Nam ƀlep lơ̆m jơ ‘năr ƀar teh đak tơbăt 50 sơnăm năr pơjing tơbôl păng 10 sơnăm pơjing tơgoăt tơgoăl Gĭt kăl.

Tổng Bí thư tơbăt jơhngơ̆m đon chơt hơ iă tơdrong atŏk tơ iung tơgoăt tơgoăl ƀar teh đak, sơkơ̆t hơdăh tơdrong lăng kơjăp hăm tơdrong atŏk kơtang tơgoăt tơgoăl hăm Singapore ‘nŏh teh đak tơjê̆ tôch gĭt kăl tơ̆ tơring păng apŭng plĕnh teh. Thủ tướng Lý Hiển Long tơbăt hăm Tổng Bí thư găh pơtôch pơma dơnuh hăm Thủ tướng Phạm Minh Chính păng rim Kơdră chĕp pơgơ̆r Việt Nam; drơ̆ng nơ̆r hăm rim nơ̆r athei đơ̆ng Tổng Bí thư Nguyễn Phú Trọng găh jang hơdoi, lăng ‘noh jĭ dôm hơyak kăl ăn jang hơdoi ƀar păh lơ̆m khei năr kơnh.

Jei lơ̆m năr 28/8, tơ̆ Hơnih hơnơ̆m Kơdră chĕp pơgơ̆r Teh đak, Kơdră chĕp pơgơ̆r Teh đak Võ Văn Thưởng hlôi sơng pơma dơnuh hăm Thủ tướng Singapore Lý Hiển Long. Ƀar ‘nu kơdră chĕp pơgơ̆r tơbăt jơhngơ̆m đon chơt hơ iă tơ̆ hơnăp tơdrong atŏk tơ iung kơtang păng iŏk đei lơ tơdrong jơnei păng ‘lơ̆ng hơ iă lơ̆m tơgoăt tơgoăl ƀar teh đak prăt 50 sơnăm au ki, mă kăl ‘nŏh jang hơdoi mŭk drăm, vei lăng sơđơ̆ng, sơđơ̆ng teh đak, pơtho pơhrăm.